عمل فورمه في اسرع وقت كمال الأجسام

ازاي تعمل فورمه بسرعه

                            التسميات: كمال الاجسام حديد

                                                  بسم الله الرحمن الرحيم 
 
القاعدة العامة لرياضة كمال الأجسام بتقول الأتي
1: تغذيه
2: استمرار في التمرين
3: راحة بدنيه وذهنيه

وزي ما قلنا كتير ان اي تقصير في اي من ال3 جوانب دول هيبقى على حساب النتائج.
واعرف ان من حكمة ربنا سبحانه وتعالى انه مش هياخد منك حاجه الا ويعوضك بحاجه تانيه مكانها.

يعني في ناس عندهم وفره غذائية كويسة جداً بس تلاقيه بيلعب شهر ويبطل شهرين
او انه مش بينام كويس بليل ، تلاقي مواعيد نوعه ملخبطه ومره ينام بدري و10 مرات متأخر
ممكن يكون عنده وفره غذائية بس جينات جسمه من النوع اللي مش بيزيد بسرعة
في وقت انك تلاقي واحد تاني بياكل اكل بسيط بس سبحان الله بتظهر عليه نتائج سريعة.

* لذلك اول حاجه تعرفها من الموضوع بتاعنا انك في حالة لو مش قادر توفر التغذية الكافية ليك
يبقى بلاش تهمل في الخطوات الأخرى 2،3
ظبط مواعيد نومك كويس ، واستمر ولا تنقطع عن التمرين وان شاء الله مع الوقت هتلاقي نتيجة بس اصبر.

- ارجع اكمل كلامي معاكم بأن مش معنى كده انك مش هتاكل بردوا وتتغذى
لأ ان شاء الله هتاكل وتتغذى بس خليك ماشي بمبدأ ان نص العمى ولا العمى كله ههههههه
يعني بلاش طمع.

الحياة مزنقه معاك وداخل جمعيات وحال البلد ما شاء الله مصانع وشركات بتقفل وربنا يستر علينا

فبلاش تطمع بقى ومش وقت طموح الله يبارك لك هههههه
انا بهديك وأوقفك على ارض صلبة عشان تقدر تحسب صح وتسفيد صح
هتعمل ايه ؟
لتالت مره معلش هقولك بلاش طمع وسيبك بقى من قصة 50% ، 40% وminimum والكلام ده
متعقدش نفسك وخدها ببساطة واعرف ايه الأكل المفيد من الأكل المضر
ووقت ما تلاقي قدامك فرصة تاكل حاجه مفيدة دووووس فيها يا معلم

ومتعقدش الأمور وهقولك على حاجه جامده مش هتحرم نفسك من الحسابات والقيم والكلام ده بردوا
لأ يا سيدي خلي minimum بتاعك في البروتين 1 جرام لكل كيلو من جسمك
يعني مثلاً لو واحد وزنه 80 كيلو هنقول مجازاً ان احتياجه اليومي من البروتين 80 جرام
 

صلى على النبي صلى الله عليه وسلم
وتعالى اقولك على شوية نصائح

- حاول في الأسبوع تاكل مرتين سمك مثلاً حتى لو كل مره أكلت سمكه
يعني تقريباً اديها نص كيلو سمك في الأسبوع
هتلاقي كيلو السمك البلطي دلوقتي عامل حوالي 14 جنيه
وظبط كده اي 50 جنيه واشتري لك شواية بتوجاز او حتى لو عندك صفيحه نضيفه عادي ممكن تأدي الغرض
واشوي السمك بتاعك بشوية رده حلوين ولا زيت بقى ولا الكلام ده

- ظبط لك طبق سلطة كبير وشيله في التلاجه .. شوية خص على طماطميه على خيارتين مع شوية شبت مع جزر الطبق ده هيعمل له من 7 الى 10 جنيه بس هيقعد معاك شوية محترمين مش اقل من اسبوع.
- عليك وعلى البيض .. عيش على قد ما تقدر كلك بيضين في اليوم مش هقولك 8 بياض بيض والكلام اللي بيعقدك ده هههههه

- اقرص على نفسك وزود شوية اللبن بتوعك 200 او 300 مل لبن في اليوم يعني تقريباً كيلو اللبن هيقد معاك 5 ايام

- هات لك 2 او 3 كيلو بطاطس سعر الكيلو دلوقتي حوالي 4 جنيه وخليه عندك في البيت ظبط منه كل يوم كلك 2 مسلوقين حجمهم متوسط عشان تظبط الكارب بتاعك

- هتلاقي الرز البسمتي (البني طويل الحبه) يبدأ معاك من 6 جنيه لحد 16
هات انت ابو 6 جنيه شغال بس عايز يبقى يتنقى هو ده الفرق بينه وبين اللي ب 16
كيلو الرز لو كلت منه 200 جرام كل يوم هيقعد معاك 5 ايام بردوا
- غطس كده واسبوع واسبوع اشتري لك فرخة صغيره ولو مجمده هتلاقيها حسب الوزن بتاعها من 25 جنيه لحد 35 جنيهانت قسمها بحيث تاكلها على يومين

- هات لك ب 5 جنيه عسل اسمر وكل يوم كل منه بما يعادل معلقة طعام هيبقى تمام وهيقعد معاك فترة حلوة

- الناس اللي عايزه تزود وزنها ومحتاجه سعرات حرارية عندك العجوه قبل التمرين بساعة هتديك بور ملوش حل
لو 5 جنيه هتقعد معاك كام يوم بردوا

- سمك الماكريل من ارخص انواع السمك تقريباً 10 - 11 جنيه الكيلو ولما بيتشوي بيبقى جامد بردوا

- عليك وعلى الشوفان يا معلم ولو مزنقه ومش عارف تجيب علبه مفيش مشكلة هات من السايب بيكون عند اي عطار نضيف
وخلي بالك ان الشوفان خفيف يعني لو نص كيلو هتلاقيه كتير
* اهم اوقات في يومك تاكل فيهم كربوهيدرات هو عند الأستيقاظ من النوم
وقبل التمرين
* واهم اوقات في يومك تاكل فيهم بروتين هو عند الأستيقاظ من النوم
وبعد التمرين وقبل ما تنام بساعتين او تلاته

متشيلش هم وتقول قد ايه وكام جرام عشان هتلاقي نفسك اتخنقت ومش عارف تجبها منين ولا منين
خدها ببساطة
لما تصحى الصبح اديها شوية فول مع بيضة مع حتة جبنة قريش وشوية سلطة حلوين

قبل التمرين شوية الشوفان بتوعك عليهم شوية اللبن اللي قلنا عليهم وممكن تحط عليهم معلقة العسل

بعد التمرين السمكه بتاعتك او حتى ربع فرخه مع شوية رز صغيرين والسلطة

وقبل ما تنام بليل اضرب حتة الجبنة القريش مع بيضة تانيه

وديماً كده حاول تظبط الأكل بتاعك افتح نفسك للأكل
بلاش تخنق نفسك وتقعد قدام الأكل وتقول هو انا لو كلت ده هيطلع لي عضلات هههههههه
اه يا عم هيطلع لك عضلات لا تقلق بس كل انت بس واتمرن صح واستمر ونام وارتاح كويس
وبص على نفسك بعد فترة هتلاقي نفسك احسن بكتير من زمان الحمد لله

الموضوع ده انا فكرت في كتابته الأيام دي بالذات لأني تلمست فعلاً ان في ناس كتير بيحصل لهم حالة احباط بسبب التغذية بتاعتهم وممكن يفكروا يسيبوا اللعبه تماماً وده اكبر غلط

واختم الموضوع بقصة صغيره او مثال خليه ديماً قدامك لو جاتلك حالة الأحباط دي
في اتنين كل واحد منهم بيحوش في حصاله

الأول بيحط كل يوم 10 جنيه وفتح الحصاله اخر الشهر لقى فيها 300 جنيه فرح
وخدهم صرفهم في كلام فاضي

التاني بيحط كل يوم 5 جنيه وفتح الحصاله اخر الشهر لقى فيها 150 جنيه بس زعل
بس قال مش مهم اصرفهم دلوقتي خليهم موجودين واديني بزود كل يوم على قد ما اقدر

بعد سنه كاملة وفي اخر شهر في السنه
الأول جه يفتح الحصالة بتاعته لقي فيها 300 جنيه وخدهم بردوا صرفهم

التاني جه يفتح الحصالة بتاعته لقي فيها 1800 جنيه فرح جدا جدا وقال بردوا هكمل عليهم

القصة دي بتعني الأتي
انك بتحط كل يوم في جسمك انواع مختلفة من التغذيه:

ممكن واحد بعد شهر او 6 شهور يوصل للشكل اللي هو عايزه ويريح من التمرين 3 ولا 4 شهور

بينما واحد تاني بقاله سنه بيلعب ولكنه لسه موصلش اوي للفورمه اللي هو عايزها ، لكن خلال السنه دي اتعلم ان الصبر شيء اساسي لذلك قال انه هيكمل .. وكل ما بيتم سنه مش بيوقف وبيقول هكمل

لو قارنت بينهم هتلاقي ان التاني احسن بكتير من الأول

من الأخر = لا تيأس 
 

وأضاف أنه يجب الحصول على بعض ادوات التدريب مثل حبل وبعض الأوزان وترامبولين، كما يجب الالتزام بتعليمات المدرب حتى لو لم يتم الذهاب للجيم.