رسالة الإكتئاب الى العالم
ي ترى بنحس بأيه ونشوف الدنيا ازاى لما بيجيلنا اكتئاب؟
العلماء كان عندهم اعتقاد ان الاكتئاب عبارة عن عدم توازن في كيمياء المخ وخصوصا في كمية ناقل العصب اسمه سيروتونين وان الناقل العصبى ده هو احدى المواد المسئولة عن الإحساس بالسعادة في الجسم والدليل على ذلك ان الشخص اللى كان بيعانى من الاكتئاب كان بيحصل ف حالته تحسن كبير جدا حيث كان بياخد ادوية بتزود كمية السيروتونين ف المخ والاعراض اللى عنده بتقل بس الاكتئاب كان اعقد من كده شوية.
كان في بنت عندها 23 سنة راحت لطبيب نفسى عشان مكنتش قادرة تمارس حياتها بشكل طبيعى بتقول ان حياتها واقفة بئالها 6 شهور تقريبا.
وبعد اول جلسة بعد ما فضل الطبيب يسألها عن الجامعة والأصدقاء ويومها العادى ماشى ازاى اكتشفت ان بئالها سنة ونص تقريبا معزولة عن الناس وانها مبتتعاملش مع اى حد خارج نطاق الشغل.
البنت بتقول مفيش أى دايرة دعم حواليا ومش بعمل اى شيء ف حياتى نهائيا غير اقلل المسئوليات المطلوبة منى زى المذاكرة او الشغل حتى دوول كمان بطلتهم مبقاش في شيء لازم اعمله او المفروض ان اعمله وده مش عشان مسئوليتى في الحياة خلصت لكن عشان كل حاجة مبئاش ليها معنى.
بتقول انها لما كانت بتصحى من النوم كانت بتفكر في مليون سيناريو مختلفين تماما عن بعض الحاجة الوحيدة اللى مشتركة ما بينهم هي عدم وجودها في الحياة.
بتقول انها كانت دايما بتحس بلا قيمة.. بلا شعور (إحساس حاد بالتقليل من الذات) كل تفكيرها انها تقيله على العالم اللي احنا عايشين فيه.
بتقول كنت بفكر أتكلم .. او اعبر ..
لكن كنت عارفة ان هيتقال عليا ببالغ!
كنت مستوعبة ان فيه فرق بين الحزن والاكتئاب
واكيد اللى انا فيه ده كان حزن بس حزن.. تقيل شوية ومكمل شويتين!
ومينفعش اشتكى عشان مش من حقى.. مش عايزة أكون عبئ .. فوق عبئ وجودى في الحياة..
فضلت تقول انها كويسة عشان تقدر تكمل حياتها ومتخسرش شغلها لحد ما الموضوع زاد عن حده والاعراض باقت غير محتملة.
فقررت تروح لطبيب نفسى ومع اول جلسة تم تشخيصها بالاكتئاب الاكلينكى وان حالتها تستدعى اخذ مضاد للاكتئاب ولكن اول ما سمعت الكلام ده قالت لا انا مش هاخد الدوا ده بيتخن وبيعمل اعراض جانبية كتير ومبيعالجش الاكتئاب بالعكس ده بيزوده.
لحد ما الاعراض بدأت تزيد معاها ومكنتش قدامها حل تانى غير انها تاخد الدوا.
وبتقول بعد سنة ونص اكتشفت ان ده كان أحسن قرار اخدته في حياتى قرار ان اتعالج.
- يمكن اه انا لسة مش كويسة 100% ومع كل ضغطة او احباط اللمبة الحمرا في دماغى بتنور وبتقولى الحل موجود امشى من هنا بسرعة انتى سبب المشاكل امشى عشان ترتاحى والناس هيا كمان ترتاح، لكن دايما بحاول اكمل ومسمعش.
وتجربة مضاد الاكتئاب مكنتش بالسوء اللى الناس بتتكلم عنه يعنى فضلت ماشىية عليه مدة وبعدها بطلته زيه زى اى دوا اخدته ف حياتى لاتعودت عليه ولا انا قاعدة بشد في شعرى من غيره.
بتقول ان من اعراضه الجانبية اللى كانت خايفة منها انه بيتخن لكنها مكنتش بالسوء اللى يخليها مثلا تزيد 20 كيلو هما كام كيلو وبعدها خسيت تانى لما بطلت.
وبتقول ان اكتر شيء كان بيجرحها في رحلة الاكتئاب هو نظرة زمايلها في الشغل:
- لدرجة ان في واحد زميلها وقع قدامه الدوا بتاعها ع الأرض فلحقه من على الأرض وجابهولها ولما قرا المكتوب قعد يتريق عليها ولما اتعصبت ف مرة ف حاجة ف الشغل قعد يعايرها بالدوا اللى بتاخده وبيقولها روحى خدى دوا المجانين بتاعك! تلاقى لسة ماخدتيش الجرعة.
يبئا هل ده عدل انك تبئا مريض بشئ ملكش اى ذنب فيه وبدل ما اللى حواليك يقفوا جنبك ويسندوك يقعدو يعايروك ويدمروك.
وبتقول كمان ف مناسبة تانية بعد ما اتعرف نسبيا انها بتاخد مضاد الاكتئاب كان ف واحدة زميلتها ف الشغل خطيبها سابها واتاثرت نفسيا اما انفصلوا فلما زارت طبيب نفسى وكتبلها مضاد الاكتئاب مرضيتش تاخده وقعدت تقول انا مش هاخد ادوية الاكتئاب اصل انا اقوى منك انا عمرى ما هبئا زيك.
بتعالج من الاكتئاب زى ما يكون الاكتئاب او المرض النفسى ده عار حاجة نخاف نقولها للناس الكل بيخاف يتوصف بيه او يتعامل مع شخص مصاب بيه والمشكلة ان الناس اللى بتقول الكلام ده كله ناس خريجين جامعات ناس متعلمين ومثقفين يعنى المفروض انهم يكونوا عارفين كويس ان زى ما في مرض عضوى في مكان مرض نفسى.
البنت بتقول انا مش عارفة ليه انا كمريضة لازم ابرر ان باخد دوا او ادافع عن فرع من فروع الطب قدام ناس اقل شخص فيهم متعلم وخريج جامعة.
فمن البديهى انهم ع الأقل يعترفوا بوجود حاجة اسمها علاج نفسى وميحاكموش اى شخص بيتعالج من مرض معين مادام هوا مالوش دخل في المرض ده طالما مش انا اللى باخد العلاج ده من نفسى يبئا انا اكيد مش غلط ان اخد دوا حالتى متشخصة بمرض معين وباخد دوا عشان اتعالج منه.
وبتقول كمان ان انا مقدرتش اتعالج من الاكتئاب بنسبة 100% لكن حالتى دايما ف تحسن والأفكار السيئة اللى ف الأول كانت بالنسبالى حقايق مبقتش بنفس القوة والحدة بتاعة زمان.
وأخيرا بئيت مصدقة لأول مرة ف حياتى ان ف قدام وف بكرة.
انا لسة بتعالج ولسة مكملة ومش لاقية وصف للسنة ونص دول من حياتى غير كلمة واحدة قالتها واحدة زميلتى وكانت بتقول انا مش قادرة اصدق ان انتى نفس الشخص اللى كان بيتنفس بالعافية علشان يدووب يقدر يعيش ولو عليه كان يقطع نفسه خالص انا معرفش ايه اللى اتغير فيكى بس لأول مرة احس انك عااااايشة.
لو كنت بتعانى من الاكتئاب صدقنى انت مش لوحدك احنا كلنا واقفين معاك حاسين بيك وبمعناتك.
الاكتئاب من أصعب الامراض واكترها تخريبا للعلاقات اللي حوالينا وعدم معرفة الناس بالتعامل الصحيح مع مرضى الاكتئاب يعتبر من اكبر الأسباب اللي بتدخل المريض ف اسوء حالات الانتكاسات.
لكن دعمك وتشجيعك المستمر للمريض وفهمك لطبيعة المرض من اكتر الحاجات اللى هتساعد المريض وهتقلل من معاناته.
روح اتعالج ومتخافش من كلام الناس لان كلامهم مش هيشفيك ولا عمرك هتعرف ترضيهم .......
