النوم افضل ام الاستيقاظ افضل

طيب ايه الحل اقول لك إحنا نبطل نوم عشان تكون ملك ال ٢٤ ساعة ايه يعنى إللي هيحصل … تعالى نشوف …

طيب تعالى نشوف مع بعض هل إحنا محتاجين للنوم ولا لأ ؟؟؟ 

بس الأول تعالى معانا نعرف إيه هو النوم  النوم: هو حالة من ارتخاء العضلات وهبوط في معدلات ضربات القلب والتنفس ، ولكن في أماكن داخل المخ بتنشط اثناء النوم .

على فكره احساس النوم ده بيحصل نتيجة إفراز هرمون في المخ اسمه المولاتنوم ومادة الادنيوزين.

طيب ازاى القهوة بتخلينا مصحصين ، وده لأن مادة الكافيين الموجودة في القهوة بتمنع شغل مادة الادنيوزين . 

طيب إيه بيحصل اثناء النوم الجسم بيفرز هرمونات هدفها تصلح الخلايا الفاسدة أو تبدلها بخلايا سليمة ، ولو تلاحظ لو أنت رياضي وبتروح جيم هتلاقي مدربك بيقولك وينصحك تنام كويس وده لأن النوم من أكثر الأوقات لبناء العضلات والعظام.

تعالى بقى نشوف إيه اللي هيحصل لو بطلنا ننام ؟؟؟؟

أول حاجه جسمك هيفقد كل المميزات إللي بتحصل عليها أثناء النوم .

وفي دراسات كتير بتأكد إن الناس اللي بتعاني من الأرق أكثر عرضة للإصابة بأمراض السكر و السمنة و الاكتئاب  ،، وعلى فكره ده بيحصل مع قلة النوم مش عدم النوم .

طيب تعالى نجرب ونحاول ما نمش….

أول يوم هيكون يوم سعيد ليه لأن المخ بيفرز مادة الدوبامين إللي بتحسسك بالسعادة والنشاط ، ولكن ده إحساس خادع ليه ؟؟؟!! 

لأنه احساس مفرط بالسعادة اللي ممكن يخليك تاخد قرارات غلط او مندفعة ومتهورة . 

طيب بعد اليوم الأول تبدأ استجابتك تكون بطيئة جدا لو حد حدف عليك كرة مثلاً هترفع ايدك متأخر عشان تمسكها وكمان الذاكرة قصيرة المدى ممكن تتأثر وممكن كمان تنسى أنت واقف هنا ليه أو كنت بتعمل ايه ؟؟؟!!!!!! 

بعد اول يومين هتبدا تفصل وتحس بالتعب من أقل مجهود ، وكمان نسبة الجلوكوز في الدم هتقل . وكمان ضعف في الجهاز المناعي ، وكمان احتمال تتعدى من أضعف انواع  البكتيريا . 

** تعالى بقى نشوف في اليوم الثالث هتلاقي أبسط الحاجات اللي بتعملها تكون في قمه الصعوبة زي ملابسك حتى كوباية الشاي مش عارف تعملها .

حتى مزاجك هيتغير ممكن تتعصب تتضحك تبكي من غير تحكم ومن غير سبب !!!!! 

ويبدأ كمان مخك يعيشك في الأوهام ، وتهلوس وتسمع أصوات غريبة وناس بتنادي اسمك !!!!! 

طيب لو قدرت تدخل في اليوم الرابع بتوصل لحالة الهلع أو جنون النوم ، والحالة دى بتخلي المصاب يحكي مع أشخاص مش موجوده أو أحداث لم تحدث !!!!! 

على فكره في دراسة اتعملت في عام ١٩٦٢  انهم كانوا في العصور الوسطى السيدات التي يتم اتهامهم بممارسة السحر كانت أحد طرق تعذيبهن هي الحرمان من النوم لفترات طويلة وده كان بيدخلهم في حالة هلع الحرمان من النوم. 

ولما كان يتم الحكم عليهم كان بيتاخد بكلامهم على إنه اعترافات بممارسة السحر ، لكنه في الأصل هو حالة هلع الحرمان من النوم . 

طيب لو دخلنا في اسبوع بدون نوم جهازك المناعي هيوقف ، حتى لو دور برد بسيط ممكن يموت ، ده كمان الجسم بيدخل في  مرحلة إنه ياكل نفسه لأن البروتينات المتخزنة في العضلات والأنسجة هتبدا تتكسر والدهون كذلك 

وتنتهي القصة بسكتة قلبية أو فشل في احد الاعضاء ثم الموت ….

عشان كده هتكون محاولة فاشلة لو بطلت تمام… 

** طيب فائدة النوم إيه هي التخلص من المخلفات الضارة التي ينتجها الجسم طوال اليوم زي مادة الامونيا . 

** طيب هتفكر تاني وتقول أنا هفضل نايم على طول ….. 

أول ٢٤ ساعة نوم الجاذبية بتشد الرئة لاسفل ، وتبدأ أنها تكش وده بياثر في خروج المخاط بصعوبة شديدة وبعدين ممكن يؤدي إلى إلتهاب رئوي بسهولة عشان كده الأطباء بينصحوا قاعدي الفراش انهم يقعدوا ويكحوا باستمرار عشان يخرجوا المخاط . 

طيب لو كملت نوم لأسبوع يعني ضمور العضلات والعظام  .

وفي الأسبوع الثاني تبدأ قرح الفراش وده بيقطع الدم عن مناطق معينة في الجسم ويموتها . 

وده بيسبب ألم شديد عشان كده اللي قبلنا قالوا  “ الشيء زاد عن حده ينقلب ضده” . 

عشان كده لازم تنام الوقت الكافي لجسمك وكمان لازم تصحى الوقت اللازم لجسمك وعشان كده في الآخر نقول : 

              " خير الامور الوسط "