السر الذهبي للتخسيس وزيادة الطاقة وبدون حرمان

يعني ايه الصيام المتقطع ؟؟!!

ببساطة كده الصيام المتقطع هو انك بتقسم يومك لجزئين جزء للأكل وجزء بيكون صيام بيكون من غير اكل بس نقدر نشرب مياه وسوائل ( بس من غير سكر عشان منبوظش الدنيا 😂) وأشهر واحسن طريقة للصيام المتقطع هي صيام 16 ساعة وتخصيص 8 ساعات للأكل 

فوائد الصيام المتقطع 

1. حرق الدهون: في خلال فترة الصيام بيبدأ الجسم يدور علي مصدر للطاقة وبيبدا يستخدم الدهون كمصدر للطاقة وبالتالي تخسيس من غير اي تعب 
2. زيادة التركيز : النظام ده بيعلي حساسية الجسم للانسولين وبيستخدم الجسم الطاقة بكفاءة أعلي وبالتالي يزيد التركيز
3. تحسين صحة القلب : في أبحاث علمية كتير اتعملت علي النظام ده وأثبتت أنه يقدر يقلل مستوي الكوليسترول الضار في الجسم وكمان بيقلل ضغط الدم وده بيقلل فرصة الإصابة بأمراض القلب 
4. تنظيم مستوي سكر الدم: خصوصا للناس اللي بيعانوا من مقاومة الأنسولين او عرضة للإصابة بسكر الدم 
5. تجديد الخلايا : في خلال ساعات الصيام بيدخل الجسم في عملية اسمها الاوتوفاجي ودي من خلالها بيتم تنضيف وتجديد خلايا الجسم

نبدأ الصيام المتقطع ازاي؟؟!!

1. التدريج مهم جدا في بداية تطبيق النظام عشان الأمور تكون اسهل يعني ممكن في البداية نقسم اليوم 12 ساعة صيام و 12ساعة اكل عشان نعود الجسم علي النظام الجديد لحد ما نوصل لتطبيق نظام 16/8
2. اختيار وقت ساعات الصيام مهم جدا عشان نقدر نكمل علي النظام ده يعني مثلا نقدر ندخل ساعات النوم جوه ساعات الصيام 
3. شرب المياه بكثرة والسوائل زي القهوة والشاي الاخضر بدون سكر وقت فترة الصيام بيساعد جدا في عدم الاحساس بالجوع 
4. نحاول نلتزم بقدر الإمكان علي الاكل الصحي في فترة الاكل وخصوصا البروتينات والخضروات والدهون الصحية ونقلل السكريات

عشان نوصل لنتائج كويسه لازم نطبق الحاجات دي:

• بلاش اكل كتير في فترة الاكل
• لازم يكون في ممارسة رياضة أو حركة
• النوم مهم جدا عشان نوصل لنتيجة كويسه لأن النوم القليل بيسبب الاحساس بالجوع 

خلاصة الكلام الصيام المتقطع نقدر نعتبره أسلوب حياة مش بس نظام تخسيس لانه بيحسن الصحة والنشاط وخلينا فاكرين دايما أن السر والتميز في الاستمرارية مش في المثالية