فيروس متلازمة اليد والقدم والفم عند الاطفال

مقدمة لذيذة :

هنتكلم النهاردة عن موضوع شاغل السوشيال ميديا و هو ظهور حبوب مليانة مايه عل جسم الطفل و معاها بقي شوية سخونية  ومبقاش ياكل زي الاول و في وجع ف بوقه المعظم هيقول ده جديري بس للاطمئنان لا ده مش جديري لسبب بسيط ان لو هو جديري كانت الحبوب ظهرت ف مناطق زي الصدر والبطن طب ده ايه دي متلازمة اسمها متلازمة اليد والقدم والفم وده بتبقي عدوى فيروسية بتيجي للاطفال اللي تحت 5 سنين تعالوا بينا نتعرف ايه هي المتلازمة دي بالضبط 

 

إيه هي المتلازمة دي؟

هي عدوى فيروسية خفيفة بتسبب طفح جلدي على اليدين والقدمين، وتقرحات صغيرة في الفم.

وبتتنقل بسهولة جدًا من طفل لطفل عن طريق اللعاب، الكحة، أو حتى لمس الأسطح الملوثة.

 

ايه الأعراض اللي ممكن تلاحظيها ؟

•     حرارة خفيفة أو متوسطة
•     فقدان الشهية
•     تقرحات مؤلمة داخل الفم
•     طفح جلدي أو حبوب صغيرة على الكفين وباطن القدم  ساعات بيظهر الطفح حوالين منطقة الحفاض أو الركبتين

 

 

 

 

السؤال الاهم دلوقتي واللي الامهات عايزه تعرفه هل الموضوع خطييير ؟

ببساطه ← لا خالص، الموضوع مش خطير ومش محتاج هلع. 

هو مزعج شوية للطفل لأنه بيحس بألم في الفم وممكن يرفض الأكل، 

لكن في أغلب الحالات بيخف لوحده خلال أسبوع تقريبًا

 

إزاي تعالجي طفلك في البيت؟

 

- الراحة التامة: خلي الطفل يرتاح في البيت بعيد عن الحضانة أو المدرسة.

- السوائل: شجعيه يشرب مياه، عصاير طبيعية، أو شوربة خفيفة.

- الأكل الطري: زي الزبادي، البطاطس المهروسة، أو الموز، عشان ميحسش بألم في الفم.

- خافض حرارة:  لو الحرارة عالية أو فيه ألم.

- النظافة: اغسلي إيدين الطفل باستمرار، ونظفي الألعاب والأسطح اللي بيلعب عليها.

- تجنب الحمضيات: زي البرتقال والليمون، لأنها ممكن تزود ألم الفم.
 

نصيحه مهمه جداااا للامهات :

1/ المتلازمة دي مش بتحتاج مضاد حيوي، لأنها فيروس مش بكتيريا

لو استخدمتوا مضاد حيوي الموضوع هيزيد اكتر 

 

2/ الرعاية في البيت بتخلي الطفل يتحسن بسرعة. أهم حاجة تبعديه عن الأطفال التانيين لحد ما يخف، عشان ميعديش حد. 

 

3/ كمان مهم تعرفي إن المناعة بتتكون بعد الإصابة، يعني الطفل غالبًا مش هيصاب بيها تاني بنفس الشكل.

4/ كمان مينفعش تدي للطفل اسبرين عشان تخففي من الحرارة خطر جدا جدا لانه هيعمل متلازمة اسمها ( rey's ) ودي لا قدر الله ممكن تدخل الطفل في غيبوبة وتسبب الوفاة 

 

إمتى تروحي للدكتور؟

لو الطفل مش بيشرب خالص، أو الحرارة مش بتنزل، أو بدأ يظهر عليه خمول شديد، أو لو الطفح الجلدي بقى منتشر جدًا، ساعتها لازم تستشيري طبيب الأطفال. 

كمان لو الطفل عنده ضعف في المناعة أو مشاكل صحية مزمنة، الأفضل تتابعي مع الطبيب من البداية.

 

في النهاية، متلازمة اليد والقدم والفم مش حاجة تخوف، بس محتاجة شوية صبر واهتمام. ولو حسيتي إنك محتارة أو مش عارفة تتصرفي، دايمًا استشارة الطبيب بتطمنك وتريحك. خليكي دايمًا متابعة صحة طفلك

 

بس كدا موضوع النهاردة خلص وافتكروا 

{ انك تستحق حياة صحيه و سعيدة }