الكلى بتستغيث ف صمت الحقها قبل فوات الأوان
الكلى بتستغيث ف صمت الحقها قبل فوات الأوان
مرض الكلى
كل يوم الكليتين بيشتغلوا من غير ما نحس. 24 ساعة، من غير أجازة. وظيفتهم مش بس ( تنقية الدم) زي ما ناس كتير فاكرة. الكلى بتنظم ضغط الدم، بتحافظ على توازن الأملاح والمعادن في الجسم، وبتنتج هرمون مهم لنخاع العظم عشان يصنع كرات الدم الحمرا. باختصار: من غير كلى سليمة، جسمك كله بيلخبط.
إيه اللي بيبوظ الكلى أصلاً؟
في سببين مسؤولين عن 70% من حالات الفشل الكلوي في العالم كله:
1. السكر: السكر العالي مع الوقت بيبهدل الأوعية الدموية الدقيقة اللي جوا الكلى. الكلى عبارة عن فلتر فيه ملايين الشعيرات الدموية. السكر بيخلي الجدران دي تسرب بروتين في البول، وده أول إنذار خطر.
2. الضغط العالي: الضغط العالي زي خرطوم الماية لو فتحتيه على الآخر. القوة دي مع الوقت بتقطع الفلتر. والمصيبة إن الضغط بيبوظ الكلى، والكلى البايظة بتزود الضغط أكتر. دايرة مقفولة.
في أسباب تانية طبعاً: التهاب الكلى المزمن، تكيس الكلى الوراثي، الاستخدام العشوائي لمسكنات الألم زي البروفين والكتافلام، حصوات الكلى اللي بتتساب من غير علاج وبعض أمراض المناعة.
طيب نعرف منين إن الكلي تعبانة؟
زي ما قولت، الأعراض بتتأخر. بس في علامات لو ركزنا علي الجسم هنلاحظ:
- تورم: ف الوش والرجل وحوالين العين بتصحي من النوم تلاقيها وارمة. ده عشان الكلى مش عارفة تنزل الماية الزيادة.
- تغيير في البول: رغوة كتير في البول معناها بروتين بينزل،أو البول لونه بقى غامق.
- حكة في الجلد: الفوسفور العالي في الدم بيخلي الجلد ياكلك.
- غثيان وطعم معدن في البوق: دي السموم اللي الكلى مش عارفة تطلعها فبتفضل في الدم.
لو عندك سكر أو ضغط، لازم تعمل تحليلين كل 6 شهور حتى لو حاسس إنك زي الفل: تحليل كرياتين في الدم ، وتحليل زلال في البول التحليلين دول بيكشفوا المرض بدري قبل م الموضوع يتطور.
مراحل المرض والتعامل معاها
الدكاترة مقسمين مرض الكلى 5 مراحل حسب كفاءة الفلترة GFR. المرحلة الأولى والتانية الكلى شغالة 60% وأكتر. هنا العلاج بسيط: ظبطي السكر والضغط، قللي الملح، اشربي ماية كفاية، ونبطل مسكنات
المرحلة التالتة الكلى نزلت لـ 30-59%. هنا لازم متابعة مع دكتور كلى كل 3 شهور، ونظبط الأكل أكتر: نقلل البروتين، نقلل البوتاسيوم والفوسفور.
المرحلة الرابعة والخامسة دي المراحل المتأخرة. الكلى نزلت أقل من 30%. هنا بنتكلم عن الغسيل الكلوي أو زراعة الكلى. والاتنين مش نهاية العالم، ناس كتير عايشة بيهم حياة طبيعية جداً وبتشتغل وبتسافر. بس الأفضل مليون مرة إننا منوصلش للمرحلة دي.
نحمي كليتنا إزاي؟
الوقاية من مرض الكلى مش محتاجة معجزات. محتاجة عادات :
1. نظبط السكر والضغط: لو عندك سكر، التراكمي ميعديش 7. لو ضغط، خليه تحت 130/80. ده أهم حاجة.
2. نقلل الملح: الملح = ضغط عالي = كلى بايظة.
3. اشربي ماية: 8 كوبايات في اليوم. الماية بتغسل الكلى. العطش المستمر إشارة إن جسمك ناقصه ماية.
4. نخس لو وزننا زايد: السمنة بتزود الضغط والسكر والالتهابات، وكلهم أعداء الكلى.
5.نبطل مسكنات : البروفين والكتافلام والدولفين لو اتاخدوا كل شوية بيقفلوا شرايين الكلى. الصداع خدي باراسيتامول، أأمن بكتير.
كلمة أخيرة
مرض الكلى مش حكم إعدام. ناس كتير عايشة بيه سنين ومبسوطة. السر كله في بدري. التحليل بدري، التشخيص بدري، العلاج بدري. منستناش لحد ما رجلك تورم أو وشك يصفر.
لو عندك سكر أو ضغط في العيلة، اعتبري تحليل الكلى ده زي تحليل السكر والضغط: حاجة روتينية بنعملها كل 6 شهور. 5 دقايق في المعمل ممكن يفرقوا معانا 20 سنة عمر.
كليتك بتخدمك كل يوم من غير مقابل. أقل حاجة نرد الجميل ونحافظ عليها.
وربنا يعافينا يارب💗صحة
