النزلة المعوية Gastroenteritis
النزله المعويه Gastroenteritis
📢 هنتكلم النهارده عن شكوى بنشوفها كتير جدًا خصوصًا في فصل الصيف، ياترى هي إيه؟
🎯 النزلة المعوية Gastroenteritis
⬅️ تعالوا مع بعض بقى نعرف يعني إيه نزلة معوية؟ وإيه أسبابها؟ وأعراضها؟ وهل ممكن تكون خطيرة؟ وتشخيصها وعلاجها؟ 🤔
✍️ بسم الله نبدأ…
⛔️ ما هي النزلة المعوية؟ 🦠
⬅️ النزلة المعوية هي التهاب يصيب المعدة والأمعاء، وبيؤدي إلى اضطراب في عملية الهضم وامتصاص السوائل،
وده ينتج عنه أهم أعراض النزلة المعوية اللي هي: الإسهال والترجيع وأعراض تانية .
⛔️ ما أسباب النزلة المعوية؟
لو عيان جايلك بإسهال وترجيع، ممكن يكون إيه السبب اللي عمل له كدا؟
1️⃣ أول حاجة أفكر فيها ممكن يكون ميكروب. والميكروب ده إما فيروسي أو بكتيري أو طفيلي..
✅ العدوى الفيروسية (وده السبب الأكثر شيوعًا): زي فيروس الروتا Rota virus (خصوصًا عند الأطفال).
✅ العدوى البكتيرية، زي السالمونيلا.
✅ الطفيليات ، زي الأميبا أو الجيارديا.
🎯 ممكن من التاريخ المرضي المحترم اللي هتاخده من المريض لو كبير، أو الأم لو الطفل صغير، تفرق اللي حد ما إيه اللي عاملك النزلة المعوية: فيروس ولا بكتيريا ولا ديدان.
2️⃣ التسمم الغذائي: نتيجة تناول أكل فاسد أو محفوظ بطريقة غير سليمه.
⛔️ ما هي أعراض النزلة المعوية؟
المريض اللي جايلك، جاي يشتكي من إيه؟
✅️ أول وأهم حاجة الإسهال.
⬅️طيب إسهال يعني إيه؟
لازم يكون أكثر من 3 مرات في اليوم، أو الادق يقولك
فيه تغير عن الطبيعي ف عددات المرات،او زي إن البراز فيه دم.
🤔وطبيعة الشعب المصري بيبالغ، تقوله عملت إسهال كام مرة يقولك 115 مرة في اليوم 🤣، أكيد كدا بيهجص، لازم الكلام يكون منطقي.
⬅️ خلاص قالك عندي إسهال مثلاً 5 مرات في اليوم.
تسأله عن: • كميته ، لونه، ريحته. • فيه دم ولا لأ. • فيه مخاط ولا لأ.
🤔هتقولي ليه بتسأل الأسئلة دي؟
علشان زي ما قولتلك بعرف منها السبب، هل هو فيروسي ولا بكتيري ولا طفيلي.
✅️ فيه ترجيع ولا لأ؟ وتسأله كام مرة، كميته، ولونه.
✅️ مغص وآلام بالبطن. وبيكون وجع البطن ف الغالب حولين السره
✅️ ارتفاع بسيط أو متوسط في درجة الحرارة.
✅️ فقدان الشهية.
✅️ صداع وإحساس بالإجهاد العام.
⛔️ ما هي المضاعفات؟
☠️ النزلة المعوية اللي هي عبارة عن شوية إسهال وترجيع ومغص، ممكن تكون خطيرة وتسبب مضاعفات لو أهملت وماخدتش علاج؟ 🥹🛀
🔹 أخطر حاجة بخاف منها هي( الجفاف.)
الجفاف ده بيكون ليه درجات: بسيط، ومتوسط، وشديد، على حسب درجة فقد السوائل.
⬅️ وبيكون أخطر طبعًا في الأطفال وكبار السن،
وممكن يحتاج لدخول المستشفى لتعويض السوائل ☠️.
⬅️ أفحص وأشوف أنا كدكتور علامات الجفاف فين؟
في الجلد، والعين، واللسان، والحالة العامة بتاعته،
هتلاقيه مدروخ كدا ومش مظبوط.
🔹 هبوط في ضغط الدم بسبب فقد السوائل عن طريق الإسهال والترجيع المستمر. وده هتلاقيه ف البنات جايه الطواري
وحالفه لازم تعلق محلول ، انا اوقات برخم واقيس الضغط
لو فوق 100/60 اقولها روحي البيت كلي واشربي 😂
🔹 خلل في معادن الجسم زي الصوديوم والبوتاسيوم.
🔹 ضعف عام وإرهاق شديد وفقدان شهية.
💥 ومحدش يقولي انت بتهول وتكبر الموضوع، شوية إسهال وترجيع ممكن يعملوا أكثر من كدا؟
أنا نفسي جالي الموضوع ده من سنتين أعتقد، وكنت بموت 😂😂.
متزعلوش، مش عاوز حد يعيط، أنا لسه عايش 🤣🤣😂
⛔️🩺 كيف يتم التشخيص؟
التشخيص غالبًا بيكون من خلال الأعراض والفحص. و ممكن أطلب تحاليل زي إيه؟
1️⃣ صورة دم.
2️⃣ تحليل براز.
3️⃣ معادن زي صوديوم وبوتاسيوم.
4️⃣ وظائف كلى، لأن حالات الجفاف الشديدة ممكن تأثر على الكلى وتدخل في فشل كلوي حاد AK
⛔️ ما هو العلاج؟
✅ أهم خطوة هي تعويض السوائل المفقودة، مش علاج الإسهال والترجيع.
• اشرب مياه كثير.
• محلول معالجة الجفاف ORS.
✅ تناول وجبات خفيفة وسهلة الهضم مثل:
🍚 الأرز. 🍌 الموز. 🥣 الشوربة. 🍞 الخبز.
✅ راحة طبعًا زي أي تعب.
✅️ شوية أدوية.
❌ مينفعش تاخد المضادات الحيوية من نفسك، لأنها مش مفيدة في أغلب الحالات .
🎯 الخلاصة
حالات النزلة المعوية تتحسن خلال أيام، لكن لو صاحبها جفاف شديد لازم أخلي بالي.
⛔️ معلش طولت عليكم، بس أعتقد استفدت
لايك وشير كثير 👍💖 باااي 👋
#اتعلم_الطب_مع_حوده
