6 عادات صحية بسيطة غيرت يومي للأفضل من غير ما أحس
6 عادات صحية بسيطة غيرت يومي للأفضل من غير ما أحس
صراحة، زيي زي أي طالب في الثانوية، مكنتش بفكر في موضوع الصحة كتير. كنت دايمًا شايف إن الاهتمام بالصحة حاجة ممكن أفكر فيها بعدين، وإن التعب والصداع وقلة التركيز جزء طبيعي من ضغط المذاكرة.
لكن مع الوقت بدأت ألاحظ إن الموضوع بيتكرر أكتر، خصوصًا وأنا بذاكر لفترات طويلة. فبدأت أقرأ وأجرب تغييرات بسيطة في يومي، من غير ما أشتري حاجات جديدة أو أعمل تغييرات كبيرة.
المفاجأة إن بعض العادات الصغيرة فعلًا فرقت معايا. ودي 6 حاجات بدأت بيها، ويمكن واحدة منها تكون مفيدة ليك أنت كمان.
1. شرب المياه
أول حاجة لاحظتها كانت موضوع المياه. كنت بشرب كوباية أو اتنين بس في اليوم كله، وده كان بيخليني أحس بصداع وتعب وقت المذاكرة. لما بدأت أهتم بشرب كمية كافية من المياه على مدار اليوم، حسيت بفرق واضح بالنسبة لي في التركيز، وقلّ الصداع اللي كان بيجيلي بعد فترة طويلة من المذاكرة.
2. تنظيم النوم
زمان كنت بسهر لحد الساعة 2 أو 3 الصبح وأصحى مرهق، وأدخل المدرسة وأنا مش قادر أركز كويس. لما بدأت أنظم نومي وأنام بدري شوية، حسيت إني بقيت أستوعب المذاكرة بشكل أفضل، وحتى مزاجي بقى أحسن خلال اليوم.
وطبعًا الموضوع مش مجرد إنام بدري وخلاص، لكن أحاول كمان أحافظ على مواعيد نوم واستيقاظ منتظمة قدر الإمكان.
3. الحركة بعد المذاكرة
الحركة كمان حاجة محدش بيديها باله، خصوصًا لما يكون أغلب اليوم مذاكرة وقعدة على المكتب. مش لازم جيم أو رياضة احترافية، أنا بدأت أمشي حوالي نص ساعة بعد المذاكرة، وده كان بيساعدني أغير الجو وأرجع للمذاكرة وأنا مرتاح أكتر بدل ما أفضل قاعد طول اليوم.
4. الاهتمام باختيارات الأكل
بالنسبة للأكل، حاولت أقلل اعتمادي على الحاجات الجاهزة والمقرمشات اللي كنت باكلها وقت المذاكرة، وأضيف اختيارات أبسط زي الفاكهة أو المكسرات. مش قلبت حياتي، التغييرات الصغيرة دي خلتني أحس إن اختياراتي في الأكل بقت أفضل بالنسبة لي.، بدل ما أعتمد طول الوقت على الأكل السريع أثناء المذاكرة.
5. تقليل استخدام الموبايل قبل النوم
حاجة تانية مهمة كانت وقت الشاشات. كنت بقعد على الموبايل ساعات طويلة قبل النوم، وده كان بيخليني أأخر وقت نومي وأدخل السرير وأنا لسه مشغول بالموبايل. لما بدأت أقلل استخدامه قبل النوم بحوالي ساعة، حسيت إن الدخول في النوم بقى أسهل بالنسبة لي، وبقيت أصحى أنشط.
6. أخذ وقت للراحة
آخر حاجة اكتشفت أهميتها كانت إني آخد وقت أريح فيه دماغي، حتى لو نص ساعة بس. ممكن أتكلم فيها مع صحابي، أسمع حاجة بحبها، أو أبعد عن المذاكرة شوية. الوقت ده ساعدني أرجع للمذاكرة وأنا أهدى وأقل توترًا بدل ما أفضل أضغط على نفسي لساعات متواصلة.
مش لازم تغيّر حياتك كلها مرة واحدة
في النهاية، مش لازم تغيّر كل حاجة مرة واحدة. أنا شخصيًا بدأت بعادة واحدة بس، وهي الاهتمام بشرب المياه، وبعدها بدأت أضيف عادة جديدة كل أسبوع أو أسبوعين.
ومع الوقت حسيت إني بقيت أقدر أذاكر وأركز بشكل أفضل، من غير ما أحاول أغير حياتي كلها في يوم واحد.
لو أنت طالب وبتحس إن ضغط المذاكرة مخليك تهمل نفسك، ممكن تبدأ بحاجة بسيطة جدًا، وتدي نفسك وقت تتعود عليها قبل ما تضيف حاجة جديدة.
الرجاء تسجيل الدخول لتتمكن من التعليق