الكيس الزلالي وطرق العلاج منـِْهـا
التفسير العلمى للكيس الزلالى ...
اى مفصل محاط بغشاء اسمه السينوفيال (Synovial membrane)
داخل الغشاء ده موجود مادة زلاليه اسمها (Synovial Fluid)
اللى بيحصل انه جزء من الغشاء اللى بيحيط بالمفصل ده بتبظ لبره وجواها السائل الزلالى
اظن مافيش تفسير اسهل من كده
وممكن كمان الكيس الزلالى دا ما يطلعش من المفصل خالص ولكن يطلع من الاغشية المحيطة بالاوتار
اظن عرفنا كده يعنى ايه كيس زلالى
نعرف بقى الاماكن اللى ممكن ييجى فيها ...
الحقيقة هو ممكن ييجى فى مفصل الكتف او الكوع او الركبة او مفاصل القدم
لكن اشهر مكان بييجى فيه هو مفصل الرسغ .. يمكن عشان المكان دا ظاهر ... ودا اللى بنتكلم عنه فى الحلقة دى
اسبابه:-
هو عبارة عن فتق للغشاء المبطن للمفصل او الاوتار نتيجة
١-الاستخدام المستمر والمجهد لمفصل الرسغ زى مثلا غسيل المواعين للسيدات
او استخدام الكمبيوتر بكترة والكتابة عليه لفترات طويلة
٢-ممكن ييجى نتيجة كدمة او وقعة على اليد تؤدى لتهتك الغشاء المحيط بالاوتار وظهور الكيس الزلالى
اعراضه ايه الكيس الزلالى ؟
-هو عبارة عن تورم فى مفصل الرسغ ٧٠% منه بيبقى فى ظاهر المفصل و٣٠ % بيبقي فى باطن الرسغ
-المفروض انه ما بيوجعش خالص
طب امتى يحصل فيه الم ؟
١-لو حصل فيه التهاب
٢-لو حجمه كبر جدا وضغط على عصب او شريان
-من الاعراض بردو انه ممكن يضايق فى حركة المفصل لو حجمه كبر شوية
نيجى بقى لاخر واهم حاجة وهو العلاج
(ملحوظة : الكلام دا مش هتلاقوه فى اى حته لانه مبنى اساسا على تجارب شخصية فى الشغل بعيدا عن الكلام الاكاديمى خالص)
الاول امتى نحتاج للعلاج وهى اصلا مش مؤلمة ولا بتعوق حركة المفصل ؟
بنحتاج للعلاج لو حجمها كبر اوى وبدأ يتكرر التهابها وبدأت تأثر على حركة المفصل
او السبب التانى وهو الاكثر شيوعا وهو منظرها اللى ما بيبقاش عاجب المريض وخصوصا السيدات واللى بيضايقهم فى لبس الحلى بتاعتهم او الساعات
هنبدأ العلاج من الاسهل فالأصعب
١-لو الكيس الزلالى لسه فى اوله ممكن مع كمادات الميا الدافية وتثبيت المفصل برباط ضاغط او حاجة اسمها رست بتشتريها من الصيدلية يختفى الكيس الزلالى
ملحوظه """" ٥٨% من الحالات بيروح الكيس الزلالى لوحدة مع الوقت بدون اى تدخل
٢- الطريقة التانية لو كبر شوية وما نفعتش الطريقة الاولى
بنجيب سرنجتين واحدة فاضية والتانية فيها كورتيزون ( البعبع ) وبنسحب الزلال بالسرنجة الفاضية وفى نفس الوقت بنحقن البعبع ( اقصد الكورتيزون ) فى الكيس
ودا بينجح فى ٥٠% فقط من الحالات عشان محدش يقوللى فى التعليقات انت عملتهالى كده يا دكتور ورجعت تانى
-- انا ليه بقول على الكورتيزون البعبع .. عشان دوا مظلوم اكتر دوا له فوايد واستخدامات فى الطب بس سمعته بطالة
٤-الاستئصال الجراحى
ودى بنستخدمها لو فشلت الطرق السابقة
وبتتعمل بمخدر كلى او موضعى .. ومدة العمملية من نص ساعة لساعة ... ونسبة الرجوع فيها حوالى ٥%
كده خلصنا ... يارب ماكونش نسيت حاجة
مش هفكركم بقى
