كيفية التخلص من اثار الحبوب

كيفية التخلص من اثار الحبوب :

في المقال دا هنتعلم روتين نتخلص بيه من اثار الحبوب اللي بتضايق اي بنت …سوء بقا انتي عيلة اكيله  مبتسمعيش الكلام ومقضياها سمن وزيت و صوديوم أو انتي من النوع اللي بطنك توجعك لو ملعبتيش في حبوب وشك وبوظتيه أو أي أن كانت انتي  اي  هي ملتك يا بت… تعالي نصلح وشك عشان يبقي صافي كدا وقمر…

خطوات التخلص من اثار الحبوب : 

مبدئيا كدا احنا محتاجين نفهم كام حاجه مع بعض ..اه ماهو شغل حافظ مش فاهم دا مينفعش ..لا نحن لسنا ببصمجية و لن نكون…ودروس الفلسفة بتاعت ادبي تشهد… اي هما الكام حاجه دول

اقولك يا ستي

1.  اسباب وجود آثار الحبوب بعد ما الحباية اتكلت ع الله
2. خطوات الروتين المناسب للتخلص من اثار الحبوب
3. منتجات مناسبة للتخلص من اثار الحبوب  

 اولا اسباب وجود آثار الحبوب

بصي يا قمر لما بشرتك تعملها معاكي ولاي سبب كان طلعتلك حباية ..ممنوع ممنوع ممنوع تلعبي فيها بصباعك أو مثلا يعني تعملي ناصحة وتقومي مفرغه اللي فيها …..استوووووووب هنا وقعت الفاس في الرأس ليييييييييه،؟! لان  يا كيوت يا قمر لما تفرغيها من البكتيريا اللي جواها اكيد البكتيريا دي هتيجي على أجزاء تانية من بشرتك وتطلع حبوب تاني + أنه اصلا لما تفرغي اللي فيها دا هيأدي الي التهاب واحمرار واي التهاب واحمرار هيتحول طوالي لاسمرار وآثار حبوب وتبقي وقتها طلعتي حبوب اكتر  وآثارها هيفضل اطول وساعتها انا هديكي جائزة اكبر مشكله في حياة نفسك هي انتي  وحليناا يا أختاه علي ما نصلح اللي هببتيه

 

روتين التخلص من اثار الحبوب : 

طيب فهمنا اسباب اثار الحبوب …حلو  محتاجين نعرف  هنغورها ازاي ..

كالاتي ..بالروتين والاستمرارية الاستمرارية الاستمرارية..

1. التقشير 
2. مادة فعالة / مادة مضادة
3. الترطيب

التقشير ..  محتاجين نقشر بشرتنا عشان نزيل الجلد الميت اللي بيدي ظل بالغمقان اصلا

طيب ينفع ملح وسكر ولمون وقهوة ومن دا   ، No No No No No ..خمسه No اهو ايكش تعملي بالكلام ،  ليه لا لان دا اسمه تقشير فيزيائي  …

اي هو التقشير الفيزيائي ؟! دا بيبقي عن طريق كشط أو فرك البشرة بمقشرات تحتوي علي حبيبات و المقشرات دي خشنه اووي علي البشرة هتجرحها + أنه مبالغ فيها اووي يعني مثلا قشرتي بسكر ولمون ومحطتيش زيت معاهم هنشفوا بشرتك جدا ممكن توصل أنها تقشر من كل حته …طيب هتقوليلي هحط زيت معاهم …مبالغ فيه بردو الزيوت هتطلعلك حبوب تاني..

الحل في التقشير الكيميائي ..اي هو التقشير الكيميائي؟! هو ممكن يكون من خلال مشتقات الريتينول مثلا زي الاكرتين  ..أو مثلا أحماض مقشرة زي السالسيليك اسيد

مادة فعالة / مادة مضادة : حلو قشرنا البشرة تقشير حلو ومش مضر وأمن نهديها بقا شوية مواد فعاله ..طب احنا محتاجين اي محتاجين نجدد خلايا بشرتنا من تاني عشان تبقي كأنها مكانش فيها حاجه ..المواد دي زي الكولاجين و بيتا سيتوستيرول أو الايلاستين..وغيره، أو مادة مضادة  المضادات الحيوية كويسه جدا لحب الشباب  الخفيفة بس احنا لو عملنا كل اللي فات ودخلنا المضادات الحيوية مثلا مرة كل كام مرة هيفرق جدا يعني هتبقي عامل مساعد كدا خطوة ثانوية ولكنها بتفرق…وعن تجربة

الترطيب طبعا انتي عملتي كل اللي فات هتيجي ع الترطيب لا طبعا دي أهم خطوة …ليه الترطيب مهم؟  لان الترطيب بيعزز تجديد خلايا البشرة ومع الوقت والاستمرارية بيدي نضارة ومرونة للبشرة هتخفف جدا من اثار الحبوب.

 

منتجات مناسبة للتخلص من اثار الحبوب نجيب اي بقا منتجات فيها كل المواد اللي احنا شرحناها وعرفنا أهميتها فوق دي عشان تخدّم كويس جدا ع المشكلة و المفعول يكون اسرع 

اولا الغسول : خطوة الغسول خطوة مهمه لتنظيف البشرة عشان نستفيد من اي منتجات هنستخدمها بعد كدا……

طب هل انا محتاجه غسول مفيش منه اتنين بالسعر الحُرشفي عشان استفاد ؟ في الحقيقة لا  ..الغسول لو فيه مواد فعاله دي حاجه جميلة ولكن لو تمنه مش قد ميزانيتي مش مضطرة اجيبه لان الغسول نفسه خطوة تنظيف استفادتي من المواد الفعاله اللي جواه مش اقوي حاجه انا كدا كدا هغسله …بس لو امكانياتك تقدري تجيبي غسول فيه مادة فعاله دي مش حاجه وحشه ..حلو انا بس بتكلم في نقطة متعجزيش نفسك عند حاجة

اقتراحات الغسولات:

1. صابونة سالسيليك اسيد
2.  غسول Tetra hydro 
3. غسول  Nano Treat
4. غسول  Kolagra 

ودا ترتيبهم من الأقل  الي الاكثر من حيث تنشيف البشرة اختاري علي حسب نوع بشرتك واللي هترتاحي عليه

 اقتراحات المقشيرات:

1. الاكرتين ( ابدائي بتركيز ربع ويفضل لو تخلطية مع كريم يوريا  )
2. سيرم السالسيليك اسيد من جارنيه
3. سيرم Nourish British 
4. سيرم ترينديفا 

استخدام اي مقشر مرتين في الاسبوع وقبل ما تجربي اي حاجه من دي تتاكدي أن معندكيش حساسية خاصة بتاع جانيه لان ريحته نفاذة شويه

اقتراحات المواد الفعالة / المضادة : 

المواد دي هنستخدمها في الأيام اللي مش هتعمل فيها تقشير  يعني ايام التقشير بعد السيرم المقشر هنحط المرطب وخلاص كدا والايام العادية هنحط حاجه صغيرة من المرطب وبعدين المواد الفعالة 

1. مادة فعالة بتتحط علي اثار الحبوب  ..كريم برناسورس هو كريم للحروق إلا أنه بيضيع اي اثار تصبغ
2. كريم المضاد الحيوي جارميسين كويس جدا الحبوب والآثار بتاعتنا

اقتراحات الترطيب

1. مرطب بانثينول 
2. مرطبskin side 
3. مرطب 1 ـ moist
4. مرطب بلانكي للاطفال

وبكدا نكون خلصنا الروتين مش لازم تجيبي اي حاجه من الاقتراحات دي مش مناسبه لميزانيتك هاتي اللي يناسبك ويناسب بشرتك اهم حاجه تعرفي المبدأ وبعد كدا تعملي روتينك الخاص …انتي كدا كدا جميلة من غير اي حاجه احنا بس بنعزز النفسية.. اشوفك علي خير 

                                               Good bye sister 

                                        💜 Purple healer