صدمة الخذلان والتعامل معها
الخذلان الم غير قابل للتخدير
اصعب حاجه في الدنيا لما تكون غرقان في دايرة امانك مسلم تماما لكل حاجه حواليك،
وفجأه يصدمك الخذلان من مصدر الامان الاساسي بالنسبه ليك،
والاصعب لما يكون بدون اسباب.
ليه ؟!
عذابك الاساسي بيكمن في عجزك عن الاجابه عن سؤال واحد هو (ليه؟)
مابتبقاش عارف انت غلط في ايه وعملت اي تستاهل تدبح عليه ؟!
وتغرق في حزنك وفي عذاب فراقه ليك،
عينك تنام بس قلبك بينزف،
كل ده عشان مش لاقي اجابه لسؤالك (ليه؟).
الشك في نفسك
وتشك في نفسك انك مش كفأ بما فيه الكفايه عشان يكون سعيد معاك،
برغم انه جنبك ومعاك من سنين السنين ودايما بيمثل انه راضي ومبسوط وفرحان،
وانك غالي وانك عالي وانك الدنيا والحياه بالنسبه ليه،
لدرجه تخليك تشك في مصدقية كل حياتك معاه.
فجأه ياخد قرار البعد والمبرر انه مبقاش حاسس براحه،
وتسأل مهما تسأل عن الاسباب مفيش اجابه هتقنعك ولا كلمه هتبرد نارك.
٣ حاجات لازم تعملها
عارف ياصديقي، ساعتها ماينفعش غير انك تعمل 3 حاجات،
مع اني عارفه ومقدره انك معندكش الطاقه انك تعمل اي حاجه،
وعايز تفضل ساكت وبس.
لكن صدقني ده مش حل،
انت كده بتموت نفسك مره تانيه،
بتكمل علي نفسك بعد اللي اتعمل فيك.
1- مواجهة نفسك
لازم تجمد واول حاجه:
تقف قدام مرايتك وتسأل نفسك، انا نيتي كانت اي تجاه البني ادم ؟،
هل صدر مني شئ اندم عليه ؟
وبعد ماتسمع منك اجابتك بنفسك تاخد قرارك انه صفحه واتقفلت،
وتبدء تعالج نفسك من اثار التعلق والخذلان.
2- اللجوء للرحمن
واقوي واسرع علاج هو اللجوء للرحمن،
ودي تاني حاجه لازم تعملها او تعمليها،
لازم تكونوا اقرب لربنا من اي وقت فات.
مش يمكن ربنا غار علي قلبك من تعلقه بغيره؟
مش يمكن عايزك تدعيلو وتصلي وتطلب منه وتشكيلو ؟
قربك من ربنا هيبني عندك صلابه نفسية رهيبه،
هتخليك تتقبل كل الاحداث اللي بتحصل حواليك بنفس هاديه وحكيمه.
3- الانشغال واليوم الممتلئ
وتالت واهم حاجه هو الانشغال بأي شئ يملي يومك،
سواء شغل او صحاب او رياضه او قراءه او تطوير من نفسك،
لغاية مالايام تعدي وحزنك معاها يعدي،
وتلاقي نفسك قدام نسخه تانيه منك اقوي واجمل،
والاهم انها نسخه واعيه وعارفه ازاي تتعامل مع كبواتها.
بعد الخذلان
قلوبنا تستاهل تفرح،
واللي مايفرحهاش مايستاهلش يكون في حياتنا.
الخذلان علي قد مابياخد روحنا،
بعد الخروج من المه بيقوينا،
وبيخلي اي حاجه تحصل بعد كده اثرها هيكون اقل بكتير من اللي حصلك،
فهتلاقي نفسك بطلت تزعل، بطلت تعاتب، بطلت تتعلق بحاجه، بطلت تتعلق بحد،
وكأن سنك كبر 100 سنه وانت من جواك يتصرخ زي العيل الصغير عشان نفسك حد يطبطب عليك.
النهاية
فهو من اصعب الصدمات اللي ممكن تعدي علي النفس البشرية،
والمها حاد جدا خصوصا لو كان الضحيه شخص مايعرفش من حياته كلها الا اللي خذله وخان وعده وطريقه،
وسابه مش عارف هيكمل ازاي.
