العنوان: شنطة الإسعافات المنزلية للأطفال..🚑💊

 5 حاجات لازم تكون في بيتك عشان تنامي مطمنة!😴😴

المقدمة:

يا أهلاً بكل "مامي" بطلة بتسهر وتتعب عشان راحة أولادها. بصفتي أم وصيدلانية، بيجيلي يومياً أمهات بيبقوا في حالة ذعر بسبب سخونية مفاجئة للطفل بالليل أو "خبطة"  مفاجأة. وعشان "الوقاية خير من العلاج"، قررت أجمع لك النهاردة "الخلاصة" في 5 حاجات لازم يكونوا في درج الأدوية عندك، لأنهم حرفياً بينقذوا الموقف في ثواني.

1. خافض الحرارة (الصديق الوفي)🌡️

السخونية دايماً بتيجي "على غفلة" وبالليل! لازم دايماً يكون عندك نوعين مختلفين من خافض الحرارة (بناءً على وزن  طفلك وسنه ).

• 👩🏻‍⚕️نصيحة صيدلانية: اسألي الصيدلي عن الجرعة المناسبة "بالظبط" حسب وزن طفلك مش سنه، واكتبيها بـ "ماركر" على العلبة عشان متنسيش وقت اللخمة.

2. كريم "خبطات الرأس" والكدمات🤕

بما إننا في عصر "الشقاوة"، مفيش طفل مبيقعش وهو بيلعب. كريمات الكدمات اللي بتحتوي على مواد طبيعية (زي الأرنيكا والريبايون) بتمنع التورم وبتخلي "الزرقان" يختفي بسرعة وبتخفف الألم.

• 👩🏻‍⚕️تكة صيدلانية: أول ما الطفل يتخبط، حطي مية ساقعة أو تلج الأول وبعدين الكريم.

3. محلول الجفاف وفوار الإسهال

النزلات المعوية منتشرة جداً، وأخطر حاجة فيها هي "الجفاف". محلول الجفاف هو المنقذ الأول قبل ما تفكري تروحي للدكتور.

• الصح: خليه دايماً عندك "أكياسORS" جاهزة للطوارئ، ومهم جداً تبدأي تعطيه للطفل بالتدريج وبكميات صغيرة كل  ربع او ثلث ساعة مثلاً .

نصيحة لو فيه إمكانية مادية تدي مصل الروتا للبيبي عند تلت وخمس شهور من عمره بيحمى البيبي بنسبة كبيرة من أكتر أسباب الجفاف اوالنزلات المعوية النتتشرة والمعدية بشكل كبير في أول سنين عمره.

4. شفاط الأنف ونقاط المحلول الملح

في فصل الشتاء أو وقت الحساسية، انسداد أنف الطفل بيمنعه من النوم والرضاعة بيخلي التنفس عنده صعب  وبيخلي البيت كله "ميعرفش ينام". شفاط الأنف اليدوي البسيط مع "بخاخ ماء البحر زي بوليميرمثلاً" أو محلول  الملح هما السحر اللي هيريح طفلك في ثواني

 بس طبعاً حتى بخاخ ماء البحر له تركيزات بيختلف من رضيع لطفل اكبر .

5. المطهر وشاش الجروح

الجروح البسيطة والخدوش محتاجة مطهر مبيحرقش (عشان الطفل ميخافش) وشاش معقم.

• نصيحة: ابعدي عن "القطن" مباشرة على الجرح لأنه بيلزق وبيوجع وقت التغيير وبيطلع من مكانه بصعوبة استخدمي الشاش المعقم أفضل.

إزاي تنظمي شنطة الإسعافات وتضمني أمان طفلك؟

بصفتي صيدلانية، هقولك على "السيستم" الصح عشان الشنطة دي تكون منقذة مش مصدر خطر:

• مكان الحفظ: لازم الشنطة تكون في مكان عالي وبعيد تماماً عن إيد ورؤية الأطفال، لكن في نفس الوقت يكون سهل عليكي "إنتي شخصياً" توصلي له بسرعة (زي رف عالي في المطبخ أو دولاب عالي). ابعدي تماماً عن تخزينها في الحمام بسبب الرطوبة اللي بتفيد الأدوية ويبقى تعبنا راح ع الفاضي😆.

• التخلص من العلب الكرتون: عشان توفري مساحة، ممكن تتخلصي من العلب الكرتون، لكن بشرط واحد: لازم تشيلي "تاريخ الصلاحية" من الكرتونة وتلزقيه بـ "صمغ" على شريط الدواء أو القارورة نفسها.

• قاعدة "الداخل أولاً": رتبي الأدوية بحيث تكون اللي صلاحيتها هتنتهي قريب هي اللي "قدام"، واللي لسه بدري عليها هي اللي "ورا".

• كشف دوري: كل أول شهر، اعملي "جرد" سريع للشنطة بطريقه التنظيم اللي ذكرناها مش هتاخد منك وقت أي دواء شرب مفتوح بقاله فترة (زي أدوية السخونية اللي غالباً بتترمي بعد 6 شهور من الفتح) لازم تتخلصي منه فوراً.

• قفل الأمان: لو تقدري تجيبي شنطة ليها "قفل" بسيط أو سحاب (سوستة) قوي الطفل ميعرفش يفتحه، يبقى كدة إنتي في الأمان التام.

الخاتمة:

يا ست الكل، وجود الحاجات دي في بيتك مش معناه إننا بنستغنى عن استشارة الطبيب، لكنها "إسعافات أولية" ضرورية لحد ما نتصرف. لو عندك أي سؤال عن نوع دواء معين أو جرعة، اكتبيلي في التعليقات وأنا كصيدلانية هرد عليكي فوراً.

ربنا يحفظ ولادنا جميعاً ويبارك في صحتهم !

آمين.