متلازمة مناعية يصاب بها مرضي الروماتويد .. فما هي؟
شايفين الصورة اللي قدامكم دي!
عشان نعرف إيه الحالة دي تعالوا نشوف السيناريو دا:-
مريض بيدخل الصيدلية و بيسأل الدكتور و دار الحوار بينهم كالتالي ..
المريض: إزيك يا دكتور عامل إيه .. أنا عايز أستشيرك في حاجة ..
الصيدلي: إزي حضرتك .. طبعًا تحت أمرك ..
المريض: أنا بقالي كتير أوي حاسس إن ريقي و لساني ناشفين، و كمان عيني ناشفة و حاسس برملة كدا في عيني على طول .. تحت عيني و تحت فكي وارمين أوي … الموضوع دا بقاله سنين كتير و مش عارف سببه ايه ..
الصيدلي: ألف سلامة على حضرتك .. طيب حضرتك بتاخد أدوية معينة الفترة دي ؟
المريض: أيوا يا دكتور .. أصل أنا كنت مريض روماتويد ف باخد كنت أدوية ليها بس الصيدلي: إن شاء الله خير .. أنصح حضرتك تروح للدكتور بتاعك و هيطلب منك شوية فحوصات و تحاليل .. و متقلقش إن شاء الله بسيطة ..
المريض: تمام يا دكتور .. شكرًا جدًّا لحضرتك -
تفتكروا ممكن تكون حالة المريض دي إيه ؟
هي متلازمة إسمها Sjogren’s Syndrome أو متلازمة شوجرن و هي عبارة عن مرض مناعي بتهاجم الغدد المسئولة عن تكوين الإفرازات .. على الغالب بتكون الغدد اللعابية و الغدد الدمعية .. ف بتقل تكوين الافرازات دي فبيحصل جفاف في العين و الأنف و الفم و كمان نتيجة الاستجابة المناعية بيحصل تورم في الغدد المفرزة .. زي الصور اللي تحت ..
-طيب إيه سببها؟
سببها الأساسي مش معلوم، لكن في الغالب هو سبب جيني و بتختلف من الشخص للتاني ..
و ليها نوعين:- ١-نوع أولى: بييجي من نفسه مش شرط يكون مصاحب للمرض، و دا جيني بحت .. ٢-نوع ثانوي: بييجي مصاحب لأمراض مناعية أو شديدة زي الروماتويد، و التهاب الكبد الوبائي Hepatitis C، و مرض الذئبة الحمراء .. و غيرهم .. و بردو العامل الجيني مسئول .. -
طيب إيه أعراضها؟ زي ما المريض فوق كان بيشرح للصيدلي .. و كمان أعراض تانية زي .. (نشفان الفم و اللسان، نشفان اللعاب او يحس ان ريقه ناشف، بسبب قلة اللعاب ف هينتج عنه: صعوبة البلع، تسوس الأسنان، وجود بقع بيضة جوا الفم و أعراض تانية زي .. (إحساس بوجود رملة جوا العين، ألم في العين و تحسسها من أبسط الحاجات، تعب مستمر، آلام في المفاصل)
طيب تفتكروا لما المريض دا يروح للدكتور بتاعه .. هيطلب منه فحوصات و تحاليل إيه؟
لازم الدكتور يتأكد من حالة المناعة جوا الجسم، ف هيطلب منه تحاليل زي:-
1-CBC (صورة الدم الكاملة): من خلالها الدكتور هيشوف نسبة الخلايا المناعية الموجودة في الدم، و لو في فقر دم أو نقص في فيتامين ب١٢ و لا لا
2-CRP: و دا بيشوف نسبة بروتين معين بيطلع نتيجة الالتهاب او الاستجابة المناعية
3-SSA test: و دا تحليل بيتعرف منه وجود نوع معين من الأجسام المضادة اسمها antinuclear antibodies (و يعتبر دا specific جدا للمتلازمة دي)
و في فحوصات تانية زي .. Schirmer’s test: و دا اختبار بنقيس بيه رطوبة العين و اختبارات تانية بتشوف مدى إفراز اللعاب ممكن الدكتور يطلب من العيان Biopsy او عينة من الغدد المصابة عشان يشوف مدى وجود الخلايا مناعية …
طيب .. و هل لمتلازمة شوجرن علاج؟
في الحقيقة .. زيه زي باقي المتلازمات .. ملوش علاج صريح يقضي عليه .. خصوصًا إنه مرض مناعي و غير معلوم السبب الرئيسي .. لكن في علاجات الدكتور ممكن يكتبها للمريض بتساعد في تخفيف الأعراض زي ..
١-أدوية بتساعد على إفراز اللعاب و الدموع زي بعض muscarinic agonists زي مادة Pilocarpine في (Isoptocarpine eye drops) و بردو مادة Cevimeline
٢- قطرات Artificial tears او الدموع الصناعية اللي بترطب العين و دي موجودة في قطرات كتير زي (Tears Guard Eye Drops)
٣-قطرات تقلل التهاب العين زي Cyclosporine اللي موجودة في قطرات كتير زي (Cyclomocond) و (Restasis)
٤-أدوية بتساعد في ألم و التهاب المفاصل (في حالة وجودها كعرض) زي: Hydroxychloroquine, Methotrexate, Azathioprine و اللي موجودين في بأسماء كتير في الصيدليات ..
و غيرها من الأدوية، و بردو على حسب الأعراض اللي بيشتكي منها المريض ..
طيب إيه النصايح اللي ممكن أنا كصيدلي أو كدكتور المفروض أنصحه بيها ؟
١-شرب المية و السوائل كتير
2-ياكل لبان عشان يحفز تكوين اللعاب
3-يغسل فمه بmouthwash لقتل البكتريا و الفطريات في فمه
5-يهتم بغسيل سنانه و الاعتناء بيها
6-يلبس نضارة شمس و هو خارج عشان يحمي عينيه من عوامل الجو و الحرارة
7-يقعد في جو رطب و يبعد عن الجفاف على قد ما يقدر …
و زي ما قلنا هي متلازمة مناعية .. في أبحاث لسة بتتعمل عليها لحد دلوقتي .. لعل قريبًا نعرف السبب الحقيقي للمتلازمة و إزاي نعالجها ..
