ليه التعلق بيدمر حياتنا
"انا من غير الشخص ده مليش قيمه " جمله ناس كتير بتقولها او بتحس بيها من غير حتي ما تأخد بالها .ساعات بنفتكر ان الي جوانا حب ،لكن بعد شويه بنكتشف انو كان تعلق ،وفرق كبير جدا بين الاتنين .
الحب بيخليك مرتاح ،أما التعلق بيخليك خايف طول الوقت .خايف الشخص يبعد ،خايف يتغير ،خايف يرد متأخر ،وخايف حتي يحب حد غيرك ،وبدل متعيش حياتك ،بتلاقي نفسك عايش مستني رساله او مكالمه او اهتمام من شخص واحد .
اي هو التعلق ؟
التعلق هو انك تربط سعادتك او قميتك او راحتك بوجود شخص او شئ معين .لدرجه ان لوالحاجه دي اختفت تحس ان حياتك كلها وقفت .
المشكله ان التعلق بيتسلل لينا واحده واحده ومبنحسش بيه غير لما نخسر الشخص او الحاجه الي كنا متعلقين بيها .
علامات بتقول انك متعلق ؟
أول ما تصحي تمسك االموبايل تشوف االشخص رد ولا لأ.
تتضايق جدا لو شفته اونلاين ومردش عليك .
تفضل تعيد قرأه الشات القديم كل شويه
يومك كله بتحدد حسب طريقه كلامك معاه .
لو أتأخر ف الرد تبدأ تقول اكيد زهق مني ..اكيد ف حد غيري .
تعتذر حتي لو انت مش غلطان ،بس عشان متخسرش الشخص .
كل دي تصرفات ناس بتعملها كل يوم لكنها ف الحقيقه مش حب ده تعلق .
والتعلق مش بيكون بالأشخاص بس ….
ف ناس متعلقه بفلوس ،لو خسرت جزء منها تحس ان حياتها انتهت .وفي ناس متعلقه بالشهره او عدد اللايكات والمتابعين. ولو البوست جاب تفاعل قليل تفضل زعلانه طول اليوم .حتي ف ناس متعلقه برأي الناس فيها .
كل الحاجات دي لو بقت مصدر سعادتك الوحيد،فأنت دخلت ف دائره التعلق
ليه التعلق بيدمر الانسان ؟
لأن الشخص المتعلق بيسلم مفتاح سعادته لغيره .
يعني لو الشخص اهتم بيه يفرح،لو اتأخر ف الرد ينهار ،لو اتغير معاه يبدأ يلوم نفسه .
ويبدأ يدور عل عيوب ف نفسه ،مع ان المشكله مش فيه ،المشكله انه بق مستني قيمته من شخص تاني .
وبعض الناس لما تكتشف انك متعلق بيها ،بتبدأ تستغل ده …..
تلاقيها تختفي وترجع وقت ما تحب .يكلمك بمزاجو ،يزعلك وهو عارف انك هترجعي تصالحيها .ممكن تقلل منك او تهينك ،وانت تسكت خوفا من انها تبعد .
ازاي نتخلص من التعلق؟
أول حاجه لازم تعرف ان الناس كلها ممكن تتغير وده طبيعي .
لكن الي مينفعش يتغير هو احترامك لنفسك .
أبدا اهتم بنفسك .اتعلم حاجه جديده ،انزلي اتمشي ،قضي وقت مع اهلك
كل ما حياتك تبقي مليانه ،كل اما احتياجاك لشخص واحد يقل .
ومتستناش حد يديك احساس بقيمتك ،لأن قيمتك موجوده بالفعل .
التعلق بالله هو الأمان الحقيقي
ف الدنيا كل شئ ممكن يتغير
لكن ربنا سبحانه وتعالي هو الوحيد الثابت .
لما قلبك يكون متعلق بربنا هتبقي دايما هادي مطمن مش خايف .
مش كل الي بيبعد عنك خساره ،ف ناس بيكون خروجها من حياتك رحمه ليك .
الي بيحبك بجد هيطمنك ،ويحترمك ومش هيخليك عايش ف خوف مستمر .
اعرفو ازاي تختارو نفسكو😊
