حمض الأزيليك صديق المرأة
حمض الأزيليك صديق المرأة
فوائد حمض الأزيليك وطريقة استخدامه وأهم النصائح
حمض الأزيليك (Azelaic Acid) بقى من المكونات المشهورة في منتجات العناية بالبشرة، خصوصًا لاستهداف مشاكل زي: حب الشباب، وآثار الحبوب البنية والحمراء الناتجة عن الالتهاب، والتصبغات، وعدم توحّد لون البشرة.
في المقال ده هنستعرض أهم المعلومات عن حمض الأزيليك، وأشهر الأسئلة المطروحة عنه، وإزاي ممكن تستخدميه بطريقة صحيحة، وأهم التحذيرات أثناء الاستخدام.
إيه هو حمض الأزيليك؟
حمض الأزيليك هو مركب موجود طبيعيًا في بعض الحبوب زي القمح والشعير، يتم استخلاصه في صورة بودر وبيُستخدم في مستحضرات العناية بالبشرة بتركيزات وأشكال مختلفة.
ومن مميزاته إنه بيساعد على تحسين تجدد سطح البشرة وتقليل انسداد المسام، وبيكون عادةً ألطف من بعض الأحماض والمقشرات القوية.
أهم فوائد حمض الأزيليك للبشرة
1. المساعدة في تقليل حب الشباب
حمض الأزيليك له خصائص مضادة للبكتيريا والالتهاب، وعلشان كده هيساعدك في تحسين بعض أنواع حب الشباب وتقليل ظهور الحبوب.
وطبعًا النتيجة ووقت العلاج مختلفين من بشرة للتانية حسب طبيعة الحبوب وحالة البشرة.
2. تحسين آثار الحبوب والتصبغات
من أشهر فوائد حمض الأزيليك إنه بيساعد على تقليل ظهور البقع الداكنة اللي ممكن تسيبها الحبوب بعد ما تختفي.
كمان ممكن يساعد على توحيد لون البشرة بشكل تدريجي، خصوصًا مع الالتزام بروتين مناسب وواقي الشمس.
3. المساعدة في تقليل الاحمرار
حمض الأزيليك بيُستخدم كمان في بعض الحالات المصاحبة للاحمرار، زي الوردية والاكزيما، بسبب خصائصه المضادة للالتهاب والبكتيريا.
4. تحسين مظهر البثور والملمس
استخدام حمض الأزيليك بانتظام ممكن يساعد على تحسين مظهر بعض أنواع البثور البيضاء والسوداء وانسداد المسام وملمس البشرة، مع الوقت والالتزام.
إزاي تستخدمي حمض الأزيليك؟
القاعدة الذهبية في استخدام المواد الفعالة، وخصوصًا في بداية الاستخدام، هي:
Consistency over intensity
يعني ببساطة: الاستمرارية أهم من الكمية!
ولو بشرتك حساسة أو لسه بتبدأي استخدام حمض الأزيليك، ممكن تستخدمي "تكنيك الساندويتش" 🥪.
على بشرة نظيفة وجافة، حطي طبقة خفيفة من الكريم المرطب المناسب لبشرتك أو ممكن تستخدمي كريم مهدئ زي الكريمات المحتوية على مادة السيكا (cica)، وبعدها كمية صغيرة من حمض الأزيليك، ثم طبقة أخرى من المرطب وبين كل خطوة والتانية اسمحلي لبشرتك تمتص المنتج لثواني .
سبق وقولنا ان حمض الأزيليك مستخلص في صورة بودر وبالتالي وانتي بتستخدميه ممكن تحسي ان المنتج بيسيب طبقة لونها أبيض على البشرة أو بيفرول، ده طبيعي حاولي تستخدميه على البشرة بطريقة الطبطبه مش الفرد وتقللي كمية المنتج على البشرة.
ومتنسيش استخدام واقي الشمس المناسب لنوع بشرتك، خصوصًا لو هدفك الأساسي تحسين التصبغات وآثار الحبوب.
ليه بنقول حمض الأزيليك هو صديق المرأة؟!
حمض الأزيليك مناسب لأنواع كتير من البشرة، ومنها البشرة الدهنية والمختلطة والعادية، حتى البشرة الحساسة مع الالتزام بالطريقة صحيحة.
ومن أهم مميزاته إنه بيستهدف أكتر من مشكلة جلدية في نفس الوقت، زي الحبوب وآثارها والتصبغات والاحمرار والكلف والبثور.
كمان يُعتبر من المكونات الموضعية المناسب استخدامها أثناء الحمل والرضاعة.
حمض الأزيليك مناسب للاستخدام صباحًا أو مساءً حسب تعليمات المنتج، مع الاهتمام بواقي الشمس خلال النهار.
⚠️ تحذيرات مهمة قبل استخدام حمض الأزيليك
⚠️ في بداية الاستخدام ممكن تحسي بوخز أو حرقان خفيف، وده ممكن يحصل عند بعض الأشخاص ويقل مع تعود البشرة. لكن لو الحرقان شديد أو مستمر، اغسلي المنتج ووقفي استخدامه واستشيري طبيب جلدية عند الحاجة.
⚠️ تجنبي استخدامه حول العين والفم والانف.
⚠️ متستخدميش كمية كبيرة من حمض الأزيليك عشان تحصلي على نتيجة أسرع؛ الكمية الكبيرة ممكن تزود فرصة حدوث التهيج والجفاف.
⚠️ حمض الازيليك غير مناسب للاستخدام على مساحات كبيرة من الجلد أو بكميات كبيرة لفترات طويلة.
⚠️ لو أول مرة تستخدميه، ابدئي بشكل تدريجي بطيء في البداية.
⚠️ متستخدميش معاه مواد فعالة أو مقشرات قوية في نفس الوقت، خصوصًا لو بشرتك حساسة، إلا لو كنتِ عارفة إن المنتجات متوافقة أو تحت إشراف متخصص.
⚠️ لو ظهر حرقان شديد، أو احمرار قوي، أو تورم، أو تهيج غير معتاد، وقفي استخدام المنتج فورًا واستشيري طبيب جلدية.
⚠️ متهمليش واقي الشمس، عامة وخصوصًا لو بتستخدمي حمض الأزيليك بهدف تحسين التصبغات وآثار الحبوب أو تجنبها.
المعلومات تم تجميعها من الروابط المرفقة :
https://www.mdpi.com/1424-8247/18/9/1273
https://doi.org/10.1016/j.ijwd.2019.05.002
الرجاء تسجيل الدخول لتتمكن من التعليق