كيف تتعامل مع المشاعر القوية بهدوء بدون كتمان

“ هذا المقال للتوعية العامة عن التواصل وفهم المشاعر، ليس تشخيصا او علاج، ولو بتحس بأعراض مستمرة، ارجع لمتخصص.”

كلنا نعرف إحساس إن كلمة واحدة أو موقف صغير يقلب اليوم كله. المشكلة مش في المشاعر نفسها، لأن ربنا خلقها لحكمة، المشكلة لما نسيبها هي اللي تقود قراراتنا.

المشاعر عاملة زي إشارة المرور، وظيفتها تنبهك، مش توقف حياتك. لما نفهم الإشارة، بنعرف نتصرف بهدوء.

أول خطوة: تسمية الشعور بدون حكم. بدل ما نقول أنا شخص عصبي أو حساس زيادة، نقول أنا أشعر الآن بموجة غضب أو حزن. الفرق كبير، الأول حكم ثابت، والتاني وصف لحالة مؤقتة وهتعدي. التسمية لوحدها بتهدي وبتخلي الواحد يشوف الموقف أوضح.

تاني خطوة: فهم الرسالة وراء الشعور. كل شعور وراه احتياج. الغضب غالباً معناه إن في حد تجاوز حدودك، والحزن معناه إنك محتاج راحة أو دعم، والقلق معناه إنك محتاج تستعد لحاجة مهمة. لما نسأل نفسنا أنا محتاج ايه دلوقتي؟ بنرجع القوة لنفسنا بدل ما نستنى حد يفهمنا.

تالت خطوة: وجود نقطة ثبات نرجع لها. كل شخص محتاج حاجة بسيطة ترجعه لنفسه لما الدنيا تتلخبط. ممكن تكون وضوء وصلاة، أو كتابة 3 حاجات كويسة حصلت في اليوم، أو شرب حاجة دافية بعيد عن الموبايل، أو تمشية قصيرة. الحاجات البسيطة دي بتفكرنا إن اليوم مش كله وحش وإن في حاجات حلوة لسه موجودة.

التعامل مع المشاعر مش معناه إننا نبقى هاديين طول الوقت، ده معناه إننا نسمح للمشاعر تيجي وتمشي من غير ما تسكن جوانا وتتحكم فينا. لما نطبق خطوة واحدة كل يوم، بنبني مع الوقت قدرة نفسية أقوى تحمينا من الضغط.

في النهاية، السلام الداخلي مش بيجي مرة واحدة، بيجي بخطوات صغيرة يومية وبتكرار المحاولة. وكل محاولة حتى لو بسيطة، هي خطوة في الاتجاه الصح.

“كتير من الناس بيلاحظوا إن كتمان المشاعر بيخليهم يحسوا بتوتر وصعوبة في النوم والتركيز، وده اللي بتتكلم عنه أبحاث في علم النفس عن علاقة المشاعر بالتوتر.”

عشان كده مواجهتها بهدوء أفضل بكتير من كتمانها. لما ندي لنفسنا وقت كل يوم حتى لو 10 دقائق نفكر احنا حاسين بإيه، ده بيساعدنا نفهم نفسنا أكتر وناخد قرارات أوضح.

كمان من الحاجات اللي بتساعد جداً هي الكتابة. مش لازم تكتبي مقال، ممكن نوتة صغيرة تكتبي فيها اللي مضايقك وبعدين تقطعيها. أو تتكلمي مع شخص تثقي فيه. أو تمارسي أي نشاط بتحبيه ذي المشي أو الرسم أو سماع قرآن. الفكرة إنك تدي لمشاعرك مساحة آمنة تخرج فيها بدل ما تفضل محبوسة جواكي وتتحول لضغط كبير. كل خطوة صغيرة بتعمليها لنفسك اليوم، هتفرق معاكي بكرة.

وخلينا نفتكر دايماً إن مفيش حد مشاعره ثابتة طول الوقت، كلنا بنمر بأيام حلوة وأيام صعبة، وده طبيعي وإنساني. المهم متخليش يوم صعب يخليك تحكمي على نفسك إنك ضعيفة. كل يوم هو فرصة جديدة تتعلمي فيها حاجة عن نفسك. حاولي النهاردة تختاري عادة واحدة بسيطة تريحك، ذي إنك تصحي 10 دقائق بدري تشربي حاجة دافية بهدوء، أو تكتبي هدف واحد صغير لليوم. الحاجات البسيطة دي مع الوقت بتبني هدوء داخلي حقيقي وبتخليكي أقوى في مواجهة أي ضغط.

"المصدر: الجمعية الأمريكية لعلم النفس APA - عن علاقة التوتر بالمشاعر"