مرض القاتل الصامت وكيف نتجنبه ولا نقع فى هذا الفخ

عارفة أن العنوان يخض وأنك دلوقتى بتسأل نفسك مين القاتل ولي صامت وأي علاقته بالصحة والجمال ولو هو مرض لي سموه كدة أصلا. كل الأسئلة دى هاتعرف أجابتها من المقال ده وهاتفهم قد أي أحنا ف خطر يا صديقي وأن الصحة فعلا ممكن تقع في فخ مرض ارتفاع ضغط الدم. أيون بالضبط كدة زي مانت قرأت وعرفت أن القاتل الصامت هو نفسه مرض أرتفاع ضغط الدم بس مش دة بس اللى هاتعرفه هنا تعالى معايا . يلا نبدأ رحلتنا الخفيفة.

من هو القاتل الصامت وما علاقته بارتفاع ضغط الدم :

مرض ارتفاع ضغط الدم من الامراض الشائعة جدا ولكنه مرض خبيث جدا جدا مش بيظهر عليك أي اعراض أنك عندك المرض ده ولا بيبان عليك أي حاجة الا بعد وقت طويل جدا وبعد ما يكون المرض تمكن منك ومن صحتك وعلشان كدة أطلقوا عليه القاتل الصامت طب هو ليه قاتل لأنه بيسبب مشاكل جسدية وصحية كبيرة جدا ومضاعفاته ممكن تهدد حياتك خصوصا لو الضغط أرتفع بشكل مفاجئ. طب وليه صامت ؟ علشان زى ماقلنا قبل كدة المرض دة مش بيدى أي انذار او تنبيهات تعرفك ان جسمك في خطر أو ان في مشكلة والجسم بيستغيث بك وبيقلك انقذنى كل ده مش بيظهر الا في وقت متأخر وساعتها نسبة خطورة المرض بتزيد.

ما معنى ارتفاع ضغط الدم:

ضغط الدم معناة هو قوة دفع الدم في الاوعية الدموية وينقسم الى قسمين .ضغط انقباضي ومعناه قوة دفع الدم أثناء انقباض عضلات الاوعية الدموية وضغط انبساطي ومعناة قوة دفع الدم أثناء انبساط الاوعية الدموية والطبيعي أن ضغط الدم بيبقي 120/80. انما ف الشخص المصاب بمرض ارتفاع ضغط الدم بيوصل ضغط الدم الى 130/80مم زئبقي.

أسباب ارتفاع ضغط الدم:

كل الأسباب غير محددة ولا تختص فقط بمرض ارتفاع ضغط الدم ولكنها بتشارك بنسبة كبيرة جدا في حدوث المرض مثل

1-التدخين لان التبغ فيه مواد كتير مسرطنة وفيه مواد كتير بتساعد في ضيق الاوعية الدموية وبالتالي ليها دور كبير في زيادة ضغط الدم بشكل دائم كما أنها تساعد في تكون الجلطات والجلطة عبارة عن تجمع دهون وتعمل كتلة تساعد على انسداد الوعاء الدموى والشرايين وبالتالي قوة دفع الدم في الشريان والوعاء الدموى هاتزيد فيزداد معاها ضغط الدم.

2-السمنة 

3-تناول الكحوليات

4-التوتر والقلق والعصبية الشديدة 

5-الأشخاص الى عندهم أمراض مزمنة تانية زي امراض الكلى ومرض السكر من المشهور والمعروف أن مرضي السكر بيجلهم مرض ارتفاع ضغط الدم بعد فترة من أصابتهم بالبول السكرى ولكن دى مش قاعدة بس بيحصل كتير مع الناس الى مش بتظبط السكر بتاعها والى دايما السكر بتاعها عال جدا وحبيبات السكر بتتجمع مع بعضها وتسد الشرايين والاوعية الدموية وبالتالي تساعد على الإصابة بمرض أرتفاع ضغط الدم

اعراض مرض ارتفاع ضغط الدم:

مش أنتى قولتي ان المرض ده ملهوش اعراض وانه مش بيدي الجسم أي تنبيهات وتحذيرات؟

صح أنا قلت كدة بس قصدي أن مفيش أعراض مميزة للمرض ولا مخصصة فقط للمرض الا بعد سنوات عديدة وبعد التمكن التام من الجسد والاعراض القادمة دي مش أعراض خاصة بالمرض بالعكس ممكن تحصل مع أمراض كتير بس على الأقل تبقي عارف أن مرض ارتفاع ضغط الدم ممكن يكون من ضمن الامراض المسببة للأعراض زي:

1-نبضات قلب سريعة والم في الصدر .

2-صداع شديد في مناطق معينة من الرأس.

3-دم في البول. 

تشخيص المرض:

ميقدرش الدكتور يشخصك بالمرض الا بعد تلات قراءات لقياس الضغط بالجهاز الزئبقي في أوقات متفرقة. 

علاج مرض أرتفاع ضغط الدم:

الدكتور هايكتبلك على ادوية مضادة لارتفاع ضغط الدم مع بعض التعليمات ومن أهمها 

1-ممارسة الرياضة لان الرياضة بتساعد دايما في تنشيط الدورة الدموية ومنع تكوين الجلطات والمساهمة في تحسين عضلة القلب وتحسين وظائفه.

2-اتباع نظام صحي وتناول وجبات صحية مثل الخضراوات والفواكهه والتقليل أو الامتناع من تناول الأطعمة السريعة اللى مليانة دهون وسكريات ومواد مسرطنة وجميعهم يساعد في زيادة ضغط الدم .

3-التوقف عن التدخين والكحوليات وأنقاص الوزن.

4-قياس الضغط بشكل منتظم كل شهر وبالأخص بعد سن الأربعين علشان لو في أي مشكلة نلحقها بدرى. 

مضاعفات مرض ارتفاع ضغط الدم:

المرض ده يتلف كل أجهزة الجسم على المدى الطويل ومن الممكن أن يؤدى الي 

1-تلف المخ والاصابة بالسكتة الدماغية

2-تلف القلب والاصابة بالذبحة الصدرية

3-تلف الكلى والاصابة بالفشل الكلوي

الان عزيزي القارئ أتمنى ان تكون تمت الإجابة على جميع الأسئلة بطريقة مبسطة وتعرفت على من هو القاتل الصمات والاهم من المعرفة هو التطبيق ونشر الوعي واتباع النصائح لنتجنب الإصابة بمرض ارتفاع ضغط الدم أو حتى نعرف كيف نتعامل مع المرضي المصابين بهذا المرض وما النصائح التي يجب أن نوجها لهم حتى يتم التعايش معه بشكل سليم وصحى ظرا لانه مرض مزمن كما ذكرنا وأحذر من القاتل الصامت