المرض القاتل الصامت
مرض الضغط.. القاتل الصامت!
لو إنت أو حد قريب ليك بيعاني من ارتفاع ضغط الدم، يبقى لازم تقرأ الكلام الجاي كويس. مرض الضغط، أو زي ما بيحبوا يسموه الأطباء "القاتل الصامت"، من أكتر الأمراض المزمنة انتشارًا في العالم، وخصوصًا في بلادنا العربية.
يعني إيه ضغط دم؟
باختصار، ضغط الدم هو القوة اللي بيدفع بيها القلب الدم في الشرايين علشان يوصل لكل أجزاء الجسم. الطبيعي إن الضغط يكون حوالي 120/80، لكن لما الأرقام دي تعلى كتير وتفضل كده على طول، هنا بيبدأ الخطر.
أعراضه إيه؟
المشكلة إن ارتفاع الضغط ممكن مايكونش ليه أعراض واضحة، وناس كتير تكتشفه بالصدفة، لكن في بعض الحالات ممكن ييجي مع:
صداع جامد خصوصًا ورا الراس// دوخة أو عدم اتزان// زغللة في العين //خفقان في القلب// نزيف من الأنف (نادرًا)
أسبابه؟
الضغط ممكن ييجي لسبب واضح، وممكن لأسباب مش معروفة، لكن من أشهر الأسباب:
التوتر والضغط العصبي
أكل فيه ملح كتير
السمنة وزيادة الوزن
قلة الحركة
التدخين
وجود تاريخ عائلي للمرض
أمراض تانية زي مشاكل الكلى أو الغدة
مضاعفاته خطيرة!
لو ما اتعالجش الضغط، ممكن يعمل مشاكل خطيرة زي:
جلطات في القلب أو المخ
فشل في الكلى
مشاكل في النظر
تضخم في عضلة القلب
علشان كده لازم ناخد المرض ده بجدية.
العلاج مش بس دوا!
أيوه، في أدوية كتير بتنظم الضغط، لكن من غير تغيير في أسلوب الحياة، العلاج مش هيكون كفاية. حاول تعمل الآتي:
1. قلل الملح في الأكل
2. خفف وزنك لو زائد
3. مارس رياضة حتى لو مشي نص ساعة في اليوم
4. ابعد عن التوتر والعصبية على قد ما تقدر
5. بطل تدخين
6. كل أكل صحي زي الخضار والفواكه والأسماك
7. تابع الضغط باستمرار
تقدر تعيش طبيعي
ناس كتير جدًا عايشة بضغط مرتفع، وبتمارس حياتها عادي جدًا، طالما ماشية على العلاج، وبتتابع مع دكتور، ومغيّرة نمط حياتها. متخليش المرض يتحكم فيك، إنت اللي تسيطر عليه.
في ناس كتير بتفتكر إن الضغط بييجي للكبار بس، لكن الحقيقة إنه ممكن يصيب الشباب كمان، وده بسبب نمط الحياة السريع والأكل الجاهز وقلة النوم. كمان القعدة على الموبايل والكمبيوتر لفترات طويلة من غير حركة بتزود فرص الإصابة.
من الحاجات اللي بتساعد على الوقاية: النوم الكويس، شرب مياه كفاية، والراحة النفسية. الضغط مش بس رقم في الجهاز، ده مؤشر على صحة القلب والشرايين. ماتستهونش لو الدكتور قالك عندك ضغط، حتى لو كنت حاسس إنك تمام. الوقاية دايمًا أحسن من العلاج، وحياتك وصحتك تستاهل تهتم بيها من بدريفي الآخر، مرض الضغط مش نهاية العالم، لكن لازم نتعامل معاه بوعي، ونتعلم نحافظ على صحتنا وننصح اللي حوالينا. صحتك أغلى من أي حاجة، خليك دايمًا متابع، واسأل دكتورك، ومتنساش تكشف حتى لو حاسس إنك كويس.
