السكر النوع الاول: مش نهاية العالم.

السكر النوع الأول: تعيش بيه من غير ما يعطلك

مرض السكر بقى اسم بنسمعه كتير، لكن النوع الأول ليه وضع خاص. هو مش مرض مرتبط بالعمر الكبير ولا بالأكل الكتير، ده بيظهر غالبًا من سن الطفولة أو الشباب، ويستمر مع الشخص طول حياته. لكن ده مش معناه إن حياتك توقف، بالعكس، ممكن تعيش طبيعي جدًا لو عرفت إزاي تسيطر عليه.

إيه هو السكر النوع الأول؟

السكر النوع الأول بيحصل لما جهاز المناعة يغلط ويهاجم خلايا البنكرياس اللي بتفرز الأنسولين. والأنسولين هو المفتاح اللي بيفتح باب الخلايا عشان يدخل السكر ويتحول لطاقة. من غيره، السكر يفضل عالي في الدم. علشان كده اللي عنده النوع الأول لازم ياخد أنسولين خارجي يوميًا. 

الأعراض اللي ممكن تظهر

فيه علامات بتخليك تشك إن فيه مشكلة زي:

عطش زيادة عن الطبيعي.

تبول متكرر

فقدان وزن من غير سبب.

إرهاق مستمر.

 

لو الأعراض دي ظهرت، لازم تعمل تحليل دم بسرعة.

التعايش اليومي مع السكر

الحياة مع السكر النوع الأول محتاجة تنظيم. الشخص لازم يقيس السكر أكتر من مرة في اليوم، ويظبط جرعات الأنسولين على حسب الأكل والنشاط. مثلًا: طفل في المدرسة ممكن يضطر يقيس السكر قبل الفسحة وياخد جرعة صغيرة على حسب الأكل اللي هاياكله. الأمر مش صعب، بس محتاج تعود.

الأكل المناسب

مفيش حاجة اسمها "ممنوع تمامًا"، الفكرة في الكمية والحساب. الأكل الصحي زي الخضار، البروتين، والحبوب الكاملة بيخلي السكر ثابت لفترة أطول. الحلويات مسموحة لكن بحساب، ومع جرعة أنسولين مناسبة. نصيحة: قسم وجباتك على مدار اليوم بدل ما تاكل مرة واحدة كمية كبيرة.

الرياضة وتأثيرها

الرياضة مش بس للرشاقة، دي كمان بتساعد الجسم يستخدم السكر بشكل أفضل. المشي نص ساعة أو لعب كرة مع صحابك بيقلل مستوى السكر ويحسن الحالة المزاجية. بس مهم قبل الرياضة وبعدها تتابع السكر عشان تتجنب الهبوط.

الجانب النفسي

اللي عنده سكر نوع أول ممكن يحس إنه مختلف أو يتعب من الروتين اليومي. هنا ييجي دور الدعم النفسي. لما الأهل والأصحاب يفهموا الموضوع، الشخص بيتشجع يكمل من غير إحساس بالعزلة. زي بنت عندها 12 سنة، لما أصحابها عرفوا إزاي يساعدوها وقت انخفاض السكر، بقيت تحس إنها مش لوحدها.

اهم حاجه ف الجانب النفسي ان مش شرط كل دقيقة نفكر المريض انه مريض علشان بيزعل علي نفسة اكتر

 

خطوات عملية تنفعك

احمل معاكا عصير أو سناك حلو للطوارئ.

متسيبش بيتك من غير أنسولين وشرائط القياس.

راقب أكلك وسجل قراءاتك في دفتر أو تطبيق.

خلي عندك خطة للطوارئ، خصوصًا في السفر أو الرحلات

 

الخاتمة

السكر النوع الأول مش عائق، هو بس روتين مختلف محتاج التزام. ومع الأنسولين، المتابعة، والأكل الصح، تقدر تحقق كل اللي نفسك فيه من غير ما تحس إن المرض قيدك. افتكر دايمًا: المرض مش اللي يوقفك، لكن إنت اللي بتقرر إزاي تعيش.