تأثير الاكتئاب على دماغك

تأثير الاكتئاب و الحزن على دماغ الإنسان و أفكاره :

الصورة دي لمخ واحد مصاب بالاكتئاب وواحد مش مصاب بيه :

ملاحظ النور والكهارب اللي في دماغ اللي على اليمين وملاحظ المخ اللي على الشمال مطفي ازي 

تخيل أن الاكتئاب بيأثر على المخ فعلا 

عارف لما حد يقولك انا حاسس اني انطفيت 

هو فعلا انطفي مخه انطفي زي ما انت شايف المخ اللي على الشمال 

تخيل أن الشخص المكتئب مش مجرد شخص بيدلع 

تخيل أنه فعلا فسيولوجيا وعصبيا في فرق بين مخ الانسان الطبيعي ومخ مريض الاكتئاب 

تاخد التقيلة واللي اغلب الناس متعرفش المعلومه دي 

أن مرض الاكتئاب مش هو الحزن والمشاعر السلبية اللي بتمر عليها في أوقات الصعبة اللي بتعيشها زي موت انسان عزيز عليك أو خسارة أو فشل 

ولكن الحزن والفشل دي أمور عادية انك تتأثر بيها 

عارف ان أعراض الاكتئاب هي نفسها الأعراض اللي بتيجي لاي إنسان 

الفرق بس في الوقت والشدة اللي بتكون فيه المشاعر دي 

يعني لو الموضوع زاد عندك عن إسبوعين بالظبط بتبقى ينفع تتشخص انك مصاب بالاكتئاب 

تعرف ان أعراض الاكتئاب أغلبنا عاشها ولو اوقات بسيطة من حياته 

تعرف ان ممكن يكون جالك اكتئاب عرفت تتعايش معاه واختفي 

أعراض الاكتئاب بسيطة أغلبنا يعرفها زي مثلا الشعور بالحزن والاسي دون سبب 

الاحساس بالذنب دون سبب 

فقدان القدرة على الاستمتاع بأي حاجة كنت قبل كدة بتستمتع  بيها 

فقدان الرغبة في اي شيء أو القدرة انك تعمل اي شيء 

فقدان الشهية أو زيادتها 

فقدان القدرة على النوم أو زيادتها عن اللزوم 

عارف الشخص اللي ببنام كتير جدا  دة ممكن يكون عندة اكتئاب والنوم عبارة عن هروب من الواقع المرير اللي هيصحي علية

تعرف ان الناس اللي بتفش غلها في الاكل أو اللي مبتاكلش خالص دول ممكن يكون عندهم اكتئاب 

تعرف ان نقص الوزن بشكل كبير او زيادته بشكل كبير من ضمن أعراض الاكتئاب 

الشخص اللي دايما بيفكر في الانتحار أو أنه يموت أو تحصله اي مصيبة المهم يهرب من الحياه اللي عايشها 

عارف الشخص اللي بيتمني الموت اكتر ما بيتمني الحياة 

تعرف ان دول عندهم اكتئاب وتخيل مطلعوش بيدلعة ولا حاجة 

تعرف أنهم اغلب الوقت بيلومه نفسهم على حاجات هما اصلا ملهمش علاقة بيها 

تعرف ان لما تقوله انت حزين ومكتئب عشان بعيد عن دينك وربنا ودة عقاب للبعد عن ربنا 

أنه بكدة انت كأنك جايب سكينه وبتقطع بيها قلبة اهون من الكلمتين دول 

عارف أنه عندة احساس بالذنب اصلا بشكل كبير اكتر من الإنسان العادي وبيلوم نفسه على كل حاجة بتحصل حواليه 

دي كلها أعراض الاكتئاب  

يمكن أغلبنا مر بواحدة أو حتى اكتر من الأعراض دي في فتره من حياته 

بس اللي بيفرق بين الشخص الطبيعي اللي بيمر بالظروف دي وبين مريض الاكتئاب 

أن الشخص الطبيعي حياته بتمشي وبيقدر يتجاوز 

اما مريض الاكتئاب هو بالفعل حياته وقفت 

لا عارف يشتغل ولا يدرس ولا عارف يقعد مع أهله أو أصحابه ويخرج معاهم زي الاول 

بقيت كل حاجه بالنسباله نفس الطعم 

طعم ماسخ ملهوش ريحة ولا لون 

حتى الاكل مبيتبلعش بس مضطر ياكل عشان يقدر يكمل حياته مع انه مش عارف يكمل حياته بس عندة امل أنه ممكن كل الالم دة يزول مع الوقت أو ربنا يريحه ويموت 

التفكير في الانتحار على باله طوال الوقت بس خايف جدا من ربنا 

خايف يخسر آخرته ما كفاية خسران الدنيا هتبقى الاثنين 

عشان كدة لو تعرف حد مريض اكتئاب او انت نفسك مريض اكتئاب  قبل ما توجهه نصيحة ليه 

اعرضه على طبيب أو اخصائي نفسي يتعالج 

الموضوع مش يستاهل هزار ولا تريقة ولا انك تتهمه بالضعف 

او انه مأفورها ومش عارف ياخد الأمور ببساطة 

دة مريض فعلا 

لو مش هتعرف تساعدة بلاش تزود أعراض المرض عندة  وتلومه أو تزعله بكلمتين بايخين ملهمش لازمة 

لو مش هتعرف تمدله ايدك بلاش تكرهه في المساعدة اصلا والحياة 

مريض الاكتئاب محتاج أدوية وجلسات نفسية مش محتاج يتبخر ويروح لشيخ عشان هو ملبوس ولا محتاج يخرج يغير جو ولا يأكل فراخ واي اكله تانية 

مريض الاكتئاب بيتعالج مريض الاكتئاب بيخف مريض الاكتئاب فيه امل أنه يرجع يعيش حياته بشكل أفضل