نصائح غالية لست الستات
💥حالتك النفسية وراحة بالك قبل اى شئ
دي اساس حياتك كلها و تظبيط هرموناتك
اساس صحتك و اساس الدايت و اساس علاجك من الأمراض. او الوقاية منها.
لو حالتك النفسية وحشة ومزاحك مش تمام
مش هتعرفى تخسى لان هرمون الكورتيزول عالي بيعلي معاه الانسولين
لو حالتك النفسية وحشة
هتلاقي جالك امراض مناعية كتير دي فيبرومالجيا او روماتويد او ms امراض كتيرررر تاني
لو عندك امراض تاني و نفسيتك وحشه مش هتخف بالعكس ممكن كمان تزيد.
انا مش بقول كده علشان احبطكم او ازعلكم
لا خالص بالعكس
انا بقول كده علشان لازم تاخدي وقفه مع نفسك وتتعاملى صح مع ظروفك وتبعدى عن كل اللى يضايقك.
.
اتعودي متفكريش فى التفاصيل كلها وخدي ٧٠٪ من حياتك بسطحيه واتعلمي التجاهل والتغافل
اتعودي تبعدي عن اي حد بيضغطك عصبيا اجتنبيه تماما واوعى تتعاملى معاه.
اتعودي تبعدي عن اي حد بيقلل من كلامك وافعالك، متخليش حاجة تافهة تهزمك
خليكى قوية دايما وواجهى مشاكلك بكل هدوء.وحكمة.
اتعودي تنسي اي مشاكل شغل مجرد ما تخرجي منه مش معقول تفكرى فى شغلك اوقات راحتك.
اتعودي تقعدي مع ناس فريش يعطوكى طاقة إيجابية ويكونوا بيحبوكى بجد وخايفين عليكى مش عشان اى غرض تانى او مصلحة عايزينها منك.
اتعودي تبعدي عن الشخصيات الشكايه الكئيبة اللى بتزود علينا الهم.
اتعودي تبعدي عن الحزن والقرف والنكد بكل صوره وأشكاله وكل ما يؤدى اليه.
عيشي ف عالم بتاعك لوحدك من صنع ايدك ومن تصميم أفكارك بكل حرية لا يشاركك فيه احد الا باذن منك.
عيشي في عالم موازي للعالم الحقيقي ضيفي فيه الناس الي تضيف سعادة و بهجة وفرحة ومعنى جديد لحياتك
وارمي ورا ضهرك ي حد يضايقك و يحزنك و يتعمد يقلل منك دا اصلا ميستاهلكيش ولا يستاهل دمعة منك.
اخرحى اتفسحى تاملى جمال الطبيعة استمتعى بالمياه والهوا والخضرة اللى ربنا خلقهم لينا.
كل دا هتقدري عليه وكله بالتدريج
ابتدي من الان باول خطوات نحو الراحة والامان
افرحى وابتهجى واضحكى من قلبك مودك هيتغير ودا هيفرق معاكى كتير.
اطردي من حياتك اي حد جاي يشتكي همه بلا هدف غير انه يسرق منك فرحتك.
اوعى تنسى صلاتك فى زحمة الدنيا وضجيج الحياة لان هى دى الحاجة اللى باقية لنا وكمان بتهدى نفسيتنا.
اشربي ٣ لتر مياه يوميا وواظبى عليه عشان صحتك وبشرتك وشبابك يدوم.
اشربي ٢ ليمون نعناع يوميا بسكر دايت
اتفرجي علي افلام تضحكك حتي لو هايفة المهم تتبسطى وتضحكى.
اتعرضي للشمس يوميا ٢٠ دقيقة خصوصا الصبح او اخر النهار
اهتمى بنفسك وبصحتك اكتر من اى حاجة فى حياتك لان مفيش حد هيهتم بيكى اكتر من نفسك.
هتستمتعى جدا بحياتك وافتكرى اننا بنعيش مرة واحدة بس وممكن الفرصة متتكررش عشان كدا لازم تعيشى فى صحة وفى سعادة مهما كانت الظروف.
