ازاي تخسي بسرعة وتتخلصي من الكروشه !!!

إزاي تخسي بسرعة وسهولة؟!!

ساعات كتير بنبقي عايزين نضبط جسمنا ونكون في شكل مناسب خاصةً لو في مناسبة قريبة زي فرح أو خطوبة وغيره، ولكن دكاترة التغذية وبعض أنواع الدايت بتكون مكلفة وبتحتاج وقت طويل من المتابعة وعلشان كده هوضح في المقالة طُرق مُجربة مش مجرد كلام عام عن إزاي تخسري وزن بسرعة وسهولة يعني ممكن تخسري من 5- 10 كيلو في خلال اسبوعين بالكتير.
ملحوظة لو حد بيعاني من أمراض مزمنة زي : الضغط أو السكر أو الانيميا وغيره، وبيتابع مع دكتور يُفضل تستشير دكتورها في الطريقة الأكثر أمانًا لفقدان الوزن في حالة وجود الأمراض ديه وربنا يشفي الجميع ولو أثناء الدايت حسيتي بأي تعب أو إرهاق زيادة وقفي الدايت علطول لأن صحتك أهم من أي حاجة. 🥰

الدايت عبارة عن موزانة بين أكل صحي وخفيف وفي نفس الوقت مش مُكلف ماديًا يعني أكيد مش هيبقي فيه جمبري بمليون جنيه ولا ستيك بمليار جنيه، وبين رياضة بسيطة تساعد علي حرق الدهون.

الدايت عبارة عن وجبتين :

الوجبة الأولي : ( الفطار)  بيتكون من فاكهة ( أي نوع بقي ) مثلاً جوافة + رمان أو برتقالة + 3 بلحات وهكذا مع كوباية من مشروبك المُفضل سواء شاى أو قهوة أو نعناع أو أيًا كان ( بس لازم المشروبات كلها تكون خالية من السكر ولو بتشربي مشروبات سريعة التحضير زي النسكافيه وغيره يُفضل توقفيها أثناء الدايت لأن حتي لو محطتيش فيها سٌكر فهي بيكون فيها نسب عالية منه + بعضها بيحتوي علي الكريمير اللي هو بيعمل فوم واللي بيسبب زيادة الوزن وخاصة نفخة في البطن ).🍇🥤

الوجبة التانية ( الغداء) بيتكون من بيضة أو بيضتين مسلوقين سواء بيض أبيض أو أحمر بدون بهارات أو مع بهارات خفيفة جدًا بس طبعًا بعيدًا عن الملح لأن بيسبب حبس المايه في الجسم وبالتالي هيمنع فقدان الوزن و بعد ما نسلق البيض هنخلطه مع خياره واحدة أو اتنين بالكتير ومعاهم شوية جبنة قريش يكون ملحها قليل ( يُفضل نستخدم الجبنة القريش لأنها بتكون صحية ودهونها مفيدة وكمان بعض الأنواع بيكون ملحها قليل علي عكس الجبن المُعلبة اللي بتبقي مليانة ملح وزيوت مهدرجة ومواد حافظة علشان تخليها تقعد فترة طويلة، فلازم نستخدم جبنة تكون طبيعية ونبعد تمامًا عن الجبن المُعلبة، فلو مفيش جبنة قريش عندك هنكتفي بالبيض المسلوق والخيار ) وبعدين هنخلط البيض المسلوق والخيار والجبنة مع بعض، وجمبهم هنأكل فاكهة لكن بكمية بسيطة زي مثلاً موزة أو 3 حبات بلح أو تمر أو جوافة واحدة أو يوسفي وهكذا ومعاهم برضو مشروبك المُفضل الخالي من السكر، ولو حسيت بزهق من البيض ممكن في تعملي سلطة بدون ملح ( عبارة عن طماطم وخيار بس مع مُراعاة إن الخيار يكون أكتر لأن الطماطم بيبقي فيها أملاح بنسب عالية برضو ) وجمبها كوز دُره مشوية من عند أي عمو بيبيع دُره في الشارع خاصةً إننا داخلين علي الشتا والشتا يعني دُره طبعًا.🌽🥚

وأكيد مننساش المايه وهي أهم حاجة بتساعدنا نتخلص من الدهون المتراكمة في جسمنا فنحاول نشرب مايه علي قد ما نقدر حتي لو هندخل الحمام ازيد من المُعتاد شوية، و نقطة مهمة وهي اوعي تأكلي وتقعدي أو تريحي أو تنامي، لازم بعد أي وجبة تتحركي أو تقفي لمدة رُبع أو نص ساعة وبعدين تقعدي تريحي فعلشان نحل المشكلة ديه، ممكن بعد الأكل تغسلي المواعين اللي كلتي فيها علشان تتجنبي القعود وتراكم الدهون في البطن أو ممكن تقرأي كتابي بتحبيه وتتمشي في البيت شوية أو تعملي أي نشاط يخليكِ واقفة لمدة رُبع أو نص ساعة بالكتير، وبالنسبة للنوم بعد الأكل فلازم يكون بعد الأكل بساعتين علي الأقل، لأن النوم بعد الأكل مباشرة من اخطر الحاجات اللي ممكن أي حد بيحاول يفقد وزن يعملها.
 

نيجي لجزء الرياضة والتمارين واللي هيكون خفيف لأن أصل الدايت نفسه خفيف ومش هيحتاج تمارين ورياضة قاسية، التمارين هتركز علي الكرش أكتر حاجة بما إنه أكتر حاجة بتلفت الانتباه لينا كبنات خاصةً لو هنلبس فساتين 👗
هسيب ليكم شوية لينكات لفيديوهات تمارين تعملوها وأنتوا في البيت ومش هتحتاج معدات خالص، يعني ممكن تعمليها في أوضتك وأنتِ واقفة أو حتي وأنت قاعدة علي السرير، التمارين ممكن تكون متعبة في البداية لكن مع الوقت هتتعوضي عليها، ولو بتزهقي بسرعة ممكن  تنوعي بين التمارين يعني اول يوم تعملي التمارين اللي في الفيديو الاول واليوم التاني تعملي تمارين مختلفة وهكذا
ملحوظة صغيرة: الفيديوهات كلها فيديوهات قصيرة علشان اللي بيزهق من الفيديوهات الطويلة + بعض الفيديوهات فيها موسيقي فممكن تكتموا الصوت والحركات كده كده بتكون باينة في الفيديو  🔈🎥
الفيديو الأول: https://youtu.be/sFpuKcrjlTw?si=djjZze7VFK2pYOu3

الفيديو التاني: https://www.youtube.com/watch?v=IomRii4OOTo&list=PL-LJKaRyfxRUNF9tW0OvwQhTRkscw3wtX&index=22

الفيديو الثالث: https://www.youtube.com/watch?v=FUPTanBcbcg&list=PL-LJKaRyfxRUNF9tW0OvwQhTRkscw3wtX&index=15

الفيديو الرابع:https://www.youtube.com/watch?v=Csq-MuJ4Vik&list=PL-LJKaRyfxRUNF9tW0OvwQhTRkscw3wtX&index=19

ولو مش بتحبي التمارين والفرهدة في حل تاني بسيط ألا وهو المشي، لو في جنينة أو حتي مكان الناس بتتمشي فيه قريب من بيتك أوحتي في شارع عادي ، حاولي تنزلي وتتمشي لمدة ساعة أو نص ساعة علي الأقل مع صاحبتك أو مامتك أو حد من إخواتك أو حتي لوحدك  علشان الحركة مهمة جدًا لعملية الحرق لأن الأكل الصحي لوحده مش كفاية للأسف.🚶‍♀️

 وبأكد الدايت ده مش هيكون أسلوب حياة، اقصي حد لإتابعه هو اسبوعين بس وبعدين بنرجع بالتدريج لنظام الأكل العادي لكن نحاول نبعد أو نقلل السكريات زي القشطوطة والبامبوظة وغيره وكمان نقلل المقليات والموالح المبالغ فيها زي الطرشي والبطاطس المحمرة وهكذا ،وممكن نستبدلها ببطاطس الفرن واللي بنقشرها ونقطعها ونتبلها ببهارات ونحطها في صينية مدهونة بشوية زيت صغيرين علشان البطاطس متلزقش ونحطها في الفرن لحد ما البطاطس تِحمر وبالهنا والشفا وطبعًا نبعد عن الحاجات اللي فيها مواد حافظة زي الشيبسي والمشروبات الغازية ولو هنأكل منها يبقي مرة في الاسبوع بالكتير ونحاول نعتمد علي أكل البيت والوصفات الصحية بعد ما نخلص الدايت ده علشان منرجعش نكتسب الوزن اللي خسرناه تاني 
وبس كده، وبالنسبة للدايت ده فهو مناسب لمختلف الاعمار، غير كده هو مش علشان تخسي وتلبسي الفستان اللي عاجبك وخلاص، هو مناسب لو عايزة تخسي في العموم وتلبسي كل اللبس اللي عاجبك، أتمني تفضلوا بصحة كويسة وتوصلوا للجسم اللي بتحلموا بيه 💗