خلل الجهاز العصبى اللارادى

مقدمة:

كلنا نعرف الضباب اللي هو اسمه بالانجليزي(Fog)  و باللهجة العامية اسمه (شبورة)  و دي عبارة عن ظاهرة طبيعية بتحصل نتيجة زيادة بخار الماء في الجو بالشكل اللي بيأثر على الرؤية بدرجات متفاوتة قد تصل أحياناً إلى شبه انعدام الرؤية و الحوادث المرورية لا قدر الله. 

لكن هل حد فيكم سمع عن ( الضباب المخي) أو اللي اسمه بالانجليزي ( Brain Fog) 

إقرأ القصة دي و إنت تفهم أكتر …

روى لى الطبيب المعالج  

جالي شاب في أوائل الأربعينات من العمر بيشتكي من شكوى غريبة جداً بقالو أكتر من سنتين. 

المريض بيقولي إنه لما بيقول الشكوى دي قدام أي دكتور كان بيرد عليه يقوله : إنت بتقول إيه؟ أنا مش قادر أفهم قصدك ..إنت بتوصف شكوى أول مرة نسمعها. 

الشخص ده بيوصف شكوته بإنه حاسس إنه عايش في عالم محاط بالضباب من كل مكان و إن في حالة من الضوضاء جوة دماغه دايماً و إنه حاسس بسريان الدم داخل عروقه و إن في كهربا ماشية في جسمه و بتتنقل من مكان لمكان مرة الدراع و مرة الفخد و مرة الساق و مرة الضهر و مرة الرقبة. 

الأعراض دي دايما بتخليه حاسس إنه منفصل عن الواقع و إنه موجود مع الناس بجسده فقط لكن تفكيره و حياته في عالم تاني خالص. 

دايما ً حاسس إنه مشتت الذهن و بيبذل مجهود خرافي عشان يقدر يركز في الواقع اللي حواليه. 

دايماً حاسس إنه شايف العالم من خلال لوح زجاج أبيض و إن ملامح كل شيء حواليه مش واضحة. 

دايماً حاسس إنه بيسمع الناس اللي حواليه زي ما يكون واحد كان في حفلة أو فرح و كان قاعد جنب (الدي چي) و خرج منه و مع ذلك إحساس الصخب و الضوضاء ما زال موجود جوة دماغه.  

الأحاسيس دي مخليه ردود أفعاله غريبة … لا هو عارف يفرح في المواقف الفرحة و لا عارف يزعل في المواقف المحزنة و ردود أفعاله لا تتناسب مع المواقف اللي بيتعرض لها .. غضب شديد في أمور ما تستاهلش و عدم اكتراث و لا مبالاة في أمور تستاهل. 

فقدان في الشهية و نزول في الوزن و انعدام الشغف لأي شئ في الحياة. 

دوخة و طنين في الأذن و ألم في البطن وصعوبة في  الإخراج و هبوط و إحساس بالجوع رغم إنه لسة واكل و إحساس بالشبع و رفض الأكل رغم إنه ما كلش طول اليوم. 

رعشة داخلية في جسمه رغم إن الجو مش برد و إحساس كإن الألياف العضلية في كل جسمة فيها رفة زي اللي بتحصل أحياناً في جفن العين عندنا كلنا. 

إحساس إنه دايماً مخضوض و خايف و ضربات قلبه بترج جسمه كله و ضيق رهيب في التنفس و ألم في الصدر زي ما يكون مترقب حصول حاجة وحشة أو منتظر سماع خبر مش حلو رغم إن مفيش أي حاجة تستدعي ده. 

 انتهت شكوة المريض و ده اللي قدرت أفتكره من شكاوى المريض الكتيرة جدا ً لدرجة إنه كان جايب معاه كراسة كاتب فيها شكوته عشان ما ينساش حاجة. 

لو حد فيكم قرأ شكاوي المريض دي كلها مرة تانية هيقول حاجة من اتنين :- 

يا إما الشخص ده ما عندوش حاجة سليمة … يا إما مجنون و مختل عقلياً. 

الشخص ده مش مجنون و لا مختل عقلياً بشهادة عشرات الأطباء النفسيين اللي راح لهم ضمن سلسلة البحث في كل التخصصات لمعرفة سبب الأعراض اللي بتجيله. 

لك أن تتخيل إن الشكاوي الكتيرة جداً دي و اللي تبدوا إنها مالهاش أي علاقة ببعضها كانت سبب في إن المريض يعدي على كل فروع الطب ما عدا تخصص النسا و الولادة. 

مش هكلمكم عن كمية الفلوس اللي اتصرفت و كمية الأشاعات و التحاليل و اللي منها عينات اتسفرت برة في معامل ألمانيا. 

مش هطول عليكم أكتر من كده .. 

عملت للمريض اختبار المنضدة المائلة و طلع عنده خلل في الجهاز العصبي اللإرادي بما فيه العصب الحائر. 

الأعراض الكتيرة جدا ً اللي عند المريض طلع سببها واحد بس وهو خلل الجهاز العصبي اللاإرادي اللي بنسميه في الطب Dysautonomia

خلل الجهاز العصبي اللاإرادي ده تقدر تشبهه بالمذر بورد بتاعة جهاز الكومبيوتر لما ڤيروس يضربها …  الجهاز كله بيكون ملخبط و بينفذ أوامر عشوائية و بيمتنع عن تنفيذ أوامر أخرى. 

مرض اضطراب  الجهاز العصبي اللاإرادي بيكون معاه خلل خطير في النواقل العصبية داخل الجهاز العصبي و أهمهم مادة ( الأسيتيل كولين) 

كتبت للمريض ده نوع علاج واحد فقط و هو من الأدوية المعروفة في علاج متلازمة الوهن العضلي. 

المريض جالي بعد أسبوعين و أول ما دخل غرفتي قالي: أنا أول مرة أحس إني باخد علاج لمشكلتي و أنا كلمت كل عيلتي عن التحسن اللي أنا حسيت بيه و كلهم بيشكروك. 

في أعراض اختفت و في أعراض ما زالت موجودة لكن في المجمل المريض اتحسن بنسبة ٥٠٪؜ في وقت قياسي و إن شاء الله مع الاستمرار على العلاج الأمور هتتحسن أكتر. 

الخلاصة:

ابحث عن اضطرابات الجهاز العصبي اللاإرادي  Dysautonomia لما يكون المريض بيشتكي من شكاوى متفرقة في كل جسمه و لم يتم الوصول لسبب واضح لتلك الأعراض.