قصة ولادة (١) الجزء الثاني
فاجئتني المولدة وحكتلي انتِ رهيبة كملي يلا ظايل شوي وبتشوفي ابنك ومرقت الساعتين وظايل منهم بس دقيقتين، سمعتهم بحكو فاكوم وشق عجان وعملية اذا اضطرينا صرت اشد اكثر واكثر بس بدون نتيجة
وبالفعل عملولي شق عجان، و2 من الممرضين يشدو على بطني من فوق عشان يساعدوا البيبي وجابو اشي بشبه الفاكوم ولكنه مش فاكوم اشي اخف واصغر منه في هاي اللحظات من قوة الوجع والشغلات الي حسيت فيها عقلي حسيته راح على محل ثاني، وانا مش معهم بس اسمعهم بقولوا شدي واشد واغمض عيوني وارجع افتحهم وتقريبا مش بوعيي
اول ما استعملوه طلع حبيبي محمد على الدنيا السلعة 8:39 الصبح، حطوه على جسمي وقصو الحبل السري فورًا واخذوا البيبي على دكتور الأطفال يفحصه لانه تأخر وهو جوا بطني بدو مي وحبوا يتأكدوا انه كلشي تمام
صح جوزي كان حابب يقصه للحبل السري بس صحته لمحمد وانه نطمن عليه كانت الاولوية الاولى، اول ما حطوه على جسمي ما طلعش صوت ولا عياط لثواني بسيطة بس بعدها صار يعيط وانا رجعتلي روحي وصرت احكيله حبيبي يا ماما وانا ابكي معه كتير بكيت وقتها وسبحان الله الراحة الي بنحسها بهذيك اللحظة والشعور الرهيب الي بتحسيه لا يوصف الله يطعمه لكل حدا
الحمد لله رب العالمين على القوة الي بحطها في المرأة وعنجد جواتنا قوة رهيبة لازم نآمن فيها لحتى نتخطى كل حدث وصعوبة بحياتنا 💞
بس حابة أوضح انه انا اخترت اكمل بدون ابيدورال لاني شفت حالي وصلت تفتح كبير وانا مش حاسة باوجاع يعني اوجاع بسيطة ومحتملة كانت، ومع هيك لقيت انتقادات وحكي انه ليش هيك عملتي بحالك والابرة بتحسيش باشي معها
بس انا اكيد بتندمش ومتمسكة بختياري الي اخترته لحد اليوم، صحيح ذايقني الحكي الي سمعته بس انا مش ندمانة وفخورة بنفسي 🥰
انتِ رهيبة آمني بقدراتك🤍🤍
هسا بوخذ معي وقت اتعافى من جروحي بس كل التعب بهون بس تشمو اطيب ريحة في الدنيا ريحة ابنكم❤️
حابة احكي للصبايا الي مقبلات على الولادة انه ما تخافوا احنا فاهمات كلشي من الدورة والطاقة والقوة الي بتنحط فينا بهذيك اللحظة مش مفهومة سبحان الله لا تقلقوا ولا تفكروا كثير البيبي جاي يعني جاي ولازم نتقبل السيرورة تبعتنا حتى لو بلشت ايجابية ونوعًا ما انتهت باشي مو مخطط اله مثل ما صار معي
وبعدها استمتعوا باحلى شعور
بالسلامة للجميع يا رب
لقراءة الجزء الاول من القصة قوموا بالدخول لحسابي الخاص على المنصة باسم (ماسال محمد حِكاية) او قوموا بالبحث بمحركات البحث عن العنوان التالي قصة ولادة الجزء الأول
