الوجه الاخر للمضادات الحيويه

النهاردة هنروح فى رحله اكتشاف المضادات الحيويه من سنه 1928 لحد دلوقتى …

1:الحياه قبل المضادات الحيويه 
2:كيفيه اكتشافها 
3:ازاى اكتشافها كان طفره و نقطه تحول 
4:ازاى احنا استخدمناها غلط و ايه ضرر دا علينا 
5:ازاى نتجنب المشاكل ديه و نتعامل صح مع الادويه    

قصه اكتشاف المضادات الحيويه مبهره كدا و كانت وليدة الصدفه و لكن فى العلوم المختلفه لازم يكون فى اجتهاد و تكون مدرك و منتبه جدا للى ببحصل حواليك و تحط تحليل منطقى ليه علشان كدا الصدفه مش بتمشى مع كل الناس

قبل 1928 كان فيه ناس كتير اوي بتموت بسبب البكتريا و الفيروسات اكتر من ضحايا الحروب

لحد عام 1928 الطبيب البريطانى الكسندر فلمنج كان عنده معمل بيزرع فيه بكتريا علشان يحاول يتوصل ل حاجه تقضى عليها …ايوة البكتريا بتتزرع زى النبات لانها كائنات حيه لو حطينا اكل مغذى ليها هتنمو و كان فيه فطر حاجه زى نبات كدة كدا المكان اللى كان فيه بكتريا ف المفاجاه اللى لاقاها ان البكتريا متجمعه كلها فى حته بعيدة عن الفطر دا ف استنتج ان الفطر دا فيه مادة بتقتل البكتريا و كان اسمها بنسليوم و علشان كدا طلع اسم المضاد الحيوى البنسيلين و كانت البذرة اللى طلع منها كل المضادات الحيويه و انقذت حياه ملايين الناس

فيه حاجه مهمه لازم نفرق بينا و هيه أن المضادات الحيوية حاجه بتقتل البكتريا و فيه حاجات تانيه بتقتل الفيروسات و مينفعش نخلط الاتنين ببعض و فيه انواع كتير اوي ل مخصصه ل كل نوع بكتريا و ديه معلومه مهمه جدا علشان اللى بيحصل دلوقتي ان ناس كتير بتاخد مضاد حيوى و هما عندهم برد و اصلا البرد ده عدوى ڤيروسيه و دا غلط

فيه مصطلح مهم جدا اسمه : مقاومه المضادات الحيوية

و هنا تكمن المشكله خلينا نتفق ان الادويه ديه كلها مواد كيميائية فى الاول و فى الاخر لازم تحت إشراف طبى لأنها بتغير فى كيميا الجسم ولازم تستخدم ب حرص و خلينا نعتبر أن البكتريا ديه ذكيه كأنها بتطور نفسها زى الانسان بالظبط هديكم مثال صغير ل دا كل يوم بنكتشف حاجات جديدة و حيل بيعملها الحراميه علشان تسرق و انت عمرك ما تتخيلها طب هيه بتعمل دا ازاى انها تشوف مثلا ازاى اتكشفت و تتفادى دا المره اللى جايه ممكن يغيرو فى شكلهم يلبسو حاجات غريبه يشوفو اللى ادامهم هيتحرك ازاى و هما يتصرفو على الأساس دا دا إلى البكتريا بتعمله

البكتريا زى الانسان عندها حاجات اساسيه علشان تعيش كل نوع مختلف يعنى فيه انواع بيكون عندها بروتينات مهمه علشان تعيش زى DNA و فيه منهم بيكون عندها جدار خليه حاجه زى حيطه بتحميها ف بنصنع الادويه على اساس انها تموّت الحاجه اللى مخليه البكتريا تعيش ف اول مره تاخد الدوا البكتيريا تتفاجأ و ما تلحقش تاخد احتياطات دا يحصل مره اتنين تلاته اربعه و مع المره الخامسه خلاص تحفظ اللى يحصل ف تبدأ تشوف هو بيموّت فيها ايه و تغيره يعنى لو المضاد الحيوى بيهد الجدار بتاعها ف تروح مثلا حاطه حاجات على الباب علشان شكله يتغير و المضاد الحيوى ما يعرفهوش و دا اللى اسمه مقاومه المضادات الحيويه ف تخيل حد اخد كل انواع المضادات الحيوية و بطريقه غلط لحد ما خلاص مبقاش يجيب نتيجه و دا شوفته بجد بسبب خبرتى ك دكتوره ان حد من كتر استعمال المضادات الحيوية مبقاش حاجه نافعه معاه و مات بسبب ان مفيش علاج و ديه مصيبه

ف الحل علشان نتجنب ان دا يحصل اننا اولا ما نلجأش للمضادات الحيويه  غير لما يكون ب اشراف طبى و ثانيا اننا لو اخدنا ناخد المضاد كله الكورس كامل و دا بيحدده الطبييب

ثالثا يكون ممنوع فى الصيدليات ان المضاد الحيوى يتاخد قرص او اتنين بس

لازم كلنا يكون عندنا وعى ب دا و نحافظ على صحتنا فى دراسات بتقول انه على عام 2050 هيكون اغلب المضادات الحيويه حصلها مقاومه و ساعتها العلاج هيكون اصعب ما هيكون و هنندم على كل وقت استسهلنا فيه و اخدنا مضاد حيوى علشان  كحه او عطسه و لما اخدنا ما كملناش المضاد الحيوى و البكتريا مش كلها مات و بترجع اشرس من الاول

حافظو على صحكتم  و صحه اللى بتحبوهم لان صحتنا امانه و علشان ما نندمش فى وقت مش هيفيد فيه الندم