ازاي اهتم بنفسيتي وازاي ده بينعكس علي اسرتي
في البدايه عشان ادور علي سعادة اولادي لازم اشوف أنا سعيده و راضيه في حياتي ولا لا ؟
الاهتمام بالاكل والشرب واللبس مهم وأساسي لكن مهم كمان الاهتمام بالصحه النفسيه اللي تترتب عليها سعادتي وسعادة اللي حواليا .
عشان اعرف اهتم بي صحتي النفسيه لازم اتابع يومي واكون منظمه جدول للمهام والأعمال المطلوبه مني اعملها مع الوضع في الاعتبار أن يكون في وقت خاص بيا اقرأ ، اسمع موسيقي ، اتكلم مع حد بحبه ، اعبر عن مشاعري بالكتابه ،اشرب المشروب المفضل ،اعمل اكل بحبه ، أمارس هوايتي و اهتم بي شغفي واسعي اني أطور من نفسي ، اسأل نفسي عن اللي يدور بداخلي ، ادور علي اللي يضايقني واحاول اعرف أسباب وحلول ،بحيث ده يكون وقت بيديني شحنه اكمل اليوم بافضل صوره ، مهم جدا افصل بين مشاكل الحياه وبين التعامل مع اولادي لان لو فضلت مسيطره عليا المشاكل مش هعرف اضيف بهجة في حياة اسرتي ،ومش هعرف اكون حقيقيه معاهم ، هكون بحاول أؤدي واجبي اتجاههم لكن بشكل صوري اكتر من أنه يكون واقعي ، مهم كمان اتابع نفسية اولادي و ده عن طريق عمل وقت مخصص ليهم و اسالهم باستمرار إذا كان في اي شئ مضايق هم ونتكلم في كل النقط اللي فكروا فيها في اي موضوع عشان اشبع احتياجاتهم النفسيه وأوضح ليهم ازاي يتخطوا الوقت ده ،مع وضع اسئلة فضوليه للعمل علي الوصول للحلول سويا بدون اي احكام او سيطره و ده يساعدهم جدا يكتسبوا مهارة حل المشكلات وينعكس علي ثقتهم بأنفسهم عندما يجدوا أنهم يقدروا أن يوصلوا للحلول بدون فرض أراء أو افكار لكن بكل موضوعية وبحب واحترام ومشاركه ، مهم جدا يكون الوقت الخاص بيهم فيه نقط معينه للحديث عنها خصوصا لما حدث خلال الاسبوع ،ويكون في أجندة الاتفاقات يتم الرجوع ليها في التجمع القادم ، كل هذا سوف ينعكس بشده علي نفسية كل افراد الاسره ،يزود التواصل والمتابعة ويحسن من الحالة المزاجيه لكل أفراد الاسره ، وفي النهايه حابة أؤكد أن صحتي النفسيه بتأثر بشكل كبير علي صحة اسرتي .
