القلب مش للحب
كتير من الناس فاكرة ان الحب ده مقره القلب ، شعار الحب هو قلب أحمر بلون الدم ، بنبعت قلوب كتير للناس اللى بنحبها على الشات ، بتقول لحبيبتك يا قلبى ، لما حد يعمل حاجة بتحبها تقوله قلبى يا ناس ، الفلانتاين عبارة عن يوم كله قلوب قلوب قلوب و دبدوب بردو ، بس بيبقى ديدوب احمر او مرسوم عليه قلب بردو ، الحقيقة الجماعة الحبيبة دول مبهدلين القلب معاهم ، إتمرمط خالص مع ان ملوش دعوة بالموضوع أوى ، الحب مش فى القلب ، الحب فى دماغنا ، فى المخ ، الشعور و الاحساس و الحب و الكره و الغضب و كل العواطف رايحة و جاية على المعلم الكبير ، المخ .
المخ ده لو حبيت اشرحولك بالبلدى كده ، هو مجموعة من الاسلاك الكهربية متشبكة فى بعض بطريقة عظيمة و فريدة و مبهرة ، و كل مجموعة مع بعضها بتطلع اشارات بطريقة اكثر تعقيداً و ابهاراً ، لا بجد مبهر ، و المخ ده شغلته زى شغلانة الحج سردينة فى لن أعيش فى جلباب أبى ، صاحب الوكالة ، الدماغ اللى بتدورها ، و عنده صبيانه اللى بيشغلهم بأوامره ، بس صبيانه لازم الصبح يظبطوه الأول عشان يدير الوكالة و هو مصحصح ، يعنى مثلا المخ عشان يشتغل محتاج حاجتين ، اكسچين ( تنفس يعنى - الرئة ) و جلوكوز ( المم بتاعه ، ما لازم ياكل ) ، فهتلاقى ان الرئة هى عبد الغفور البرعى اللى كان بيجرى يجيب الشيشة للمعلم سردينة عشان ياخد ( النفسين ) اللى هيعمروا الطاسة ( الدماغ ) ، و مش بس كده ، كوباية الشاى التقيلة اللى كان بيحبها معسلة و سكرها زيادة ، و ده مصدر الجلوكوز اللى كان بيبدأ بيه يومه .
المخ ده حكاية و حكاية كل حاجة فى جسمك ( الوكالة ) و هو اللى بيشغل كل حاجة ، بس انا سرحت و نسيت اقولك طب ليه الناس فاكرة ان الحب ده فى القلب !!!
بص الحكاية كلها ان دقات قلبك اللى بتحسها لما تشوف حبيبتك هى كانت سبب الربط ده ، و اللى هو اساساً ناتج عن اشارات بردو من المعلم سردينة ، تسريع ضربات القلب بسبب شحنة أدرينالين اتضخت فى الدم بأوامر منه هى سبب الدقات السريعة دى و اللى بسببها اتهرينا قلوب حمرا و دباديب حمرا فى الڤلانتاين ، أتمنى بعد ما عرفتوا الحقيقة نبدأ بقى نصنع امخاخ قطن يشتريها الحبيب لحبيبته و بدل ما يعزمها فى مطعم رومانسى ياخدها فى أى مسمط ياكلها سندوتشات مخ و يعيشوا لحظات رومانسية بعقلهم مش بقلبهم و بعد ما يخلص و يحاسب و يروح بيتهم العاشق الولهان يستخدم مخه تانى و يفكر كويس قبل ما ياخد قرار 😂
سردينة بيسلم عليك
