ما هو التوتر

كلنا عشنا اللحظات دي :دقات قلب سريعة احساس ب"الكتمة"و أفكار بتدور في الدماغ كأنها في خلاط مش راضي يقف.التوتر ضيف تقيل مش بيستأذن قبل ما يدخل اللي بقى من سمات العصر الحديث 

بس ايه هو التوتر فعليا بعيدا عن المصطلحات الطبية الناشفة 

التوتر: ده الصديق القديم اللي فقد السيطرة اصلا، التوتر مش شر مطلق بالعكس ده نظام حماية قديم جدا مزروع في جيناتنا .لما كان الإنسان القديم بيواجه نمر كان التوتر بيفرز الادرينالين عشان يقول للجسم"اما انك تجري بأسرع ما فيك أو تحارب عشان تعيش" 

المشكلة إننا النهاردة مبقيناش بنواجه نمور بقينا بنواجه:

• تأخر رسايل الايميل من المدير

• زحمة الطريق و أنت متأخر عن معاد مهم 

• فواتير آخر الشهر و الالتزامات اللي مبتخلصش

• مقارنة حياتنا اليومية باللقطات المثالية بتاعت الناس التانية على السوشيال ميديا

الحقيقية إن أجسامنا مش بتفرق ما بين النمر المفترس و ضغوطات الحياة هي بتتعامل مع الضغطين بنفس الطريقة و ده بيخلينا في حالة طوارئ طول الوقت بتاكل في طاقتنا و صحتنا و نفسيتنا 

ازاي جسمنا بيقولنا إنه اكتفى؟

التوتر ذكى جدا، لو اتجاهلت اشاراته النفسية هيكلمك بلغة الجسد افتكر معايا كام مرة  كده عانيت من:

• صداع فجأة في نهاية يوم طويل و مرهق

• آلام في القولون و المعدة من غير سبب 

• شد عضلي غريب في الرقبة أو الاكتاف 

• أرق أو العكس: رغبة مستمرة في النوم عشان تهرب من الواقع

ملاحظة :التوتر المستمر مش بيغير ظروفك هو بس بيغير قدرتك في التعامل معاها هو بيسرق لحظتك دلوقتي عشان يخليك تقلق على مستقبلك اللي لسه مجاش

الدليل النفسي للتعامل مع التوتر

مش هقولك "اتنفس براحة و عيش في سلام " لأننا بشر و الواقع بيفرض نفسه. لكن فيه خطوات بسيطة و سهلة ممكن تخفف التقل ده:

• افصل شوية: لو حسيت أن دماغك هتنفجر سيب الفون، ابعد عن شاشة الكمبيوتر 5 دقايق بس بص من الشباك أو اغسل وشك بماية ساقعة

• قسم مهماتك: المشاكل الكبيرة بتبقى مخيفة فقسم مهماتك بدل ما تفكر "ازاي هخلص المشروع ده؟ " اسأل نفسك ايه الخطوة الصغيرة اللي ممكن اعملها في ال15 دقيقة الجاية؟ 

• اتعلم تقول "لا":نص توترنا بييجي من مجاملات و ضغوطات وافقنا عليها و احنا معندناش طاقة ليها حماية طاقتك النفسية مش أنانية ده حقك

• اتكلم مع شخص"آمن":أحيانا مجرد فضفضة لصديق بتفرغ شحنة التوتر الضخمة اللي جوانا الإعتراف بالضغط مش ضعف

في النهاية،التوتر جزء من كينونتنا كبشر و هو دليل على انك بتهتم و انك بتحاول و إنك مش آلة ساكتة مفيش مشكلة إنك تحس بالضغط أحيانا لكن خليك فاكر دايما انك متخليش الضيف الخفيف ده واخد بيتك و خد نفس عميق فالأمور في الآخر و بشكل ما بتعدي