إزاي تعرفي إن طفلك عنده التهاب رئوي وإزاي تعالجيه ( احمي طفلك )
احمي طفلك: إزاي تعرفي إن طفلك عنده التهاب رئوي وأهم طرق العلاج والوقاية خليكي معايا …
الالتهاب الرئوي عند الأطفال من الأمراض الخطيرة اللي ممكن تصيب الجهاز التنفسي وتسبب مشاكل كبيرة لو ما اتعالجتش بدري كتير من الأمهات ممكن يخلطوا بين أعراضه وأعراض البرد أو الكحة العادية لكن الحقيقة إن التهاب الرئة عند الأطفال محتاج متابعة فورية من دكتور أطفال و في المقال ده هنعرفك أعراض الالتهاب الرئوي عند الأطفال و أسبابه و طرق العلاج ونصائح الوقاية…
الأول تعرفي يعني إيه التهاب رئوي عند الأطفال؟ أقولك أنا …
التهاب الرئة بيحصل لما بكتيريا أو فيروسات تدخل الرئة وتعمل التهاب في الحويصلات الهوائية وده بيأثر على التنفس وبيخلي الطفل تعبان جدًا. الأطفال بيكونوا أكثر عرضة لأن مناعتهم لسه ضعيفة، والرئة صغيرة، فأي التهاب بيأثر عليهم بسرعة.
أما أعراض الالتهاب الرئوي عند الأطفال فخدي عندك ….
عشان تفرقي بين البرد والالتهاب الرئوي، خلي بالك من الأعراض دي:
سخونة عالية مش بتنزل بسهولة حتى مع خافض الحرارة.
كحة قوية ومستمرة، أحيانًا معاها صوت صفير أو أزيز.
صعوبة أو سرعة في التنفس، تلاحظي إن صدره وبطنه بيتحركوا بسرعة أو مناخيره بتفتح وتقفل وهو بيتنفس.
خمول شديد وقلة النشاط.
رفض الأكل أو الشرب.
في الحالات الشديدة زي زرقة في الشفايف أو أطراف الأصابع بسبب نقص الأكسجين ودي هتبقى (حالة طارئة فخلي بالك ).
و أسباب التهاب الرئة عند الأطفال هي :-
إهمال علاج دور برد أو إنفلونزا.
العدوى البكتيرية (زي المكورات الرئوية) أو الفيروسية (زي الفيروس المخلوي التنفسي).
ضعف جهاز المناعة.
التعرض للتدخين السلبي.
الجو البارد والرطوبة العالية.
طيب طرق علاج الالتهاب الرئوي عند الأطفال لو شكّيتي إن ابنك أو بنتك عنده التهاب رئوي اي هي ؟!
الاول روحي لطبيب أطفال فورًا.
الدكتور هيكشف وممكن يطلب أشعة أو تحاليل للتشخيص.
العلاج بيكون:
مضاد حيوي لو السبب بكتيري.
أدوية للأعراض ودعم للمناعة لو السبب فيروسي.
راحة تامة وشرب سوائل دافية.
تهوية الغرفة كويس، والبعد عن الدخان أو الروائح القوية.
طرق الوقاية من الالتهاب الرئوي عند الأطفال
الالتزام بمواعيد التطعيمات.
غسل إيدين الطفل باستمرار.
التغذية السليمة لرفع المناعة.
تجنب المخالطة مع أشخاص عندهم برد أو إنفلونزا.
الحفاظ على درجة حرارة معتدلة في البيت.
خدي الخلاصة بقى :-
الالتهاب الرئوي عند الأطفال مش مرض يتسابه أو يتأجل في علاجه، لأنه ممكن يتطور بسرعة ويسبب مشاكل في التنفس أو نقص في الأكسجين، وده خطر كبير على حياة الطفل. أهم حاجة إن الأم أو الأب يكونوا وعيين للأعراض المقلقة زي السخونة اللي مش بتنزل، الكحة اللي بتزيد مع الوقت، أو التنفس اللي يبقى أسرع من الطبيعي. لو الأعراض دي ظهرت، مفيش وقت للتجربة في العلاجات المنزلية، لازم دكتور أطفال يشوف الحالة فورًا ويحدد العلاج المناسب.
كمان الوقاية أهم من العلاج، يعني تحرصي إن ابنك ياخد التطعيمات في مواعيدها، وتبعديه عن أي شخص مريض بالبرد أو الإنفلونزا، وتحافظي على تهوية البيت من غير ما يتعرض لتيارات هوا باردة مباشرة. التغذية السليمة وشرب المياه والسوائل مهمين جدًا لتقوية جهاز المناعة. كمان لو طفلك بيعاني من حساسية صدر أو ربو، لازم تكوني حريصة أكتر في فترات البرد، وتتابعي مع دكتور باستمرار. أفتكري دايمًا إن متابعة صحة طفلك والتصرف بسرعة لو في حاجة مش طبيعية، هو أكبر ضمان لحمايته من أي مضاعفات خطيرة، خصوصًا مع أمراض الجهاز التنفسي اللي بتيجي فجأة وتشتد بسرعة. وبس كدا وألف سلامة على اطفالكم وربنا يشفيهم ويعافيهم اللهم آمين ..
