الاعضاء الVIP
Mamine95 Vip حقق

$10.01

هذا الإسبوع
أكثر الأعضاء تحقيق للأرباح هذا الاسبوع
Mamine95 Vip حقق

$10.01

هذا الإسبوع
شروحات بلس المستخدم أخفى الأرباح
تقني بلس - Teqany Plus Articles admin حقق

$1.07

هذا الإسبوع
Ali المستخدم أخفى الأرباح
Ahmed Adel Founder المستخدم أخفى الأرباح
Mohamed Ebrahim حقق

$0.55

هذا الإسبوع
Ahmed Adel حقق

$0.43

هذا الإسبوع
أهم المعلومات حقق

$0.36

هذا الإسبوع
mahmut gasim حقق

$0.34

هذا الإسبوع
Mohamed Salah المستخدم أخفى الأرباح
تأخر نمو اللغه عند الاطفال

تأخر نمو اللغه عند الاطفال

تأخر نمو اللغه عند الاطفال

تأخر الكلام عند الاطفال في عصرنا ده بقى سمه اساسيه في اي طفل و كتير من اولياء الامور بيقلقوا و بيسألو السؤال الشائع :

امتى اعرف ان ابني متأخر في الكلام ؟ او

"ابني عنده سنتين او ثلاثه و بيتكلم كلمات بسيطه زي (بابا - ماما - جده - امبو - مم )

هل كده متأخر في الكلام ولا ايه ؟؟ و لو متأخر اعمل ايه ؟؟

**الاجابه انه اكيد متأخر لغويا .... و عشان نعرف ليه اتأخر لازم نعرف حياته شكلها ايه ؟؟

يعني...

- هل لما بتندهي عليه بيبصلك و ينتبهلك ؟؟

- هل بينفذ اوامر اول ما تقولي و بيبقى فاهمك ؟؟

- هل بتنفذي طلباته قبل ما يتكلم او يشاورلك عليها حتى ؟؟

- هل بيشاور على طلباته او بياخدك من ايدك عشان تلبي طلبه ؟؟

- هل بيتفاعل مع الاخرين و الاطفال اللي زيه ؟؟

- هل بيتفرج على التلفزيون او ماسك الموبايل على طول ؟؟

- هل بيروح حضانه ولا لأ ؟؟

و بعد ما نجاوب على الاسئله دي كلها طبعا فيه سؤال مهم جدا و هو اذا كان فيه مشاكل صحيه قبل او اثناء او بعد الولاده ؟؟

طبعا لو فيه مشاكل يبقى كده عرفنا سبب التأخر ايه و هنا هيبقى محتاج فريق عمل يشتغل معاه من تنمية مهارات و تخاطب و تخصصات تانيه اذا تطلب الامر...

** ليه التلفزيون و الموبايل و التاب لأ ؟

الاليكترونيات و تأثيرها على نمو اللغه عند الاطفال :

حضرتكم بتسيبو الاطفال قصاد التلفزيون او الموبايل بالساعات و مش مقدرين ان ده سبب رئيسي من اسباب تأخر نمو اللغه عند اولادكم و بيحولهم لشخص مستقبل بس يعني معندوش فرصه انه يعبر...

الالكترونيات بشكل عام بتسبب تأخر في نمو و تطور اللغه - تشتت في الانتباه - تعلم سلوكيات سلبيه عشان محدش يقول بتجيب "توحد" !!

**لو مضطر تفتح التلفزيون يبقى ساعه واحده تكفي تقسم على مدار اليوم و يا ريت تعطى كمحفز قبل المذاكره او بعد المذاكره او مراعاة توقيت تقديمها( بلاش وقت الاكل يتفرج على الكرتون)

اختاروا محتوى البرامج اللي بيشوفها الطفل و تقسموا الساعه على مدار اليوم بالكامل متبقاش ساعه متواصله و متسبوش الطفل يتفرج لوحده يا ريت يبقى معاه حد و يشرحله اللي بيحصل في الكرتون و خلي فيه مناقشه بينكم يعني تسأليه ايه اللي بيحصل؟؟ او انت شايف ايه؟؟ او هو عمل ايه؟؟ خلي يبقى فيه تفاعل بين الطفل و بينك في موضوع الكرتون اللي شغال ...

**اعمل ايه لما اتأكد ان ابني طفل متأخر لغويا ؟؟

- لازم الطفل ينزل حضانه حتى لو "عمره سنه و نص" عشان يبدأ يتعلم ازاي يتفاعل مع الاطفال اللي زيه و الاخرين. "حضانه كويسه متركنوش قصاد تلفزيون"

- يتعمل تقييم لغوي ( اختبار لغه ). *اذا كان عنده محصول لغوي من الجمل من كلمتين

- يتعمل اختبار ذكاء.( افضل عمر لتطبيق اختبار الذكاء من 4 سنوات اذا كان الطفل عنده محصول لغوي يقدر يعبر بجمل"

- يبدأ جلسات تخاطب. "من جلستين الى 3 جلسات في الاسبوع او مكثف و مدة الجلسه من الطبيعية من 20 : 30 دقيقة وبنكثف المده من30 الى 45 دقيقه" و ده بيحدده الاخصائي على حسب قدرة الطفل في التحصيل و الاستيعاب

- ارشاد اسري ( ماما هتعمل ايه معاه في البيت ) و ديه اللي عليها عامل كبيير في سرعة تطور الطفل .

**ماما هتعمل ايه في البيت ؟؟

- لازم نمنع التلفزيون و الموبايل و التاب و اي اليكترونيات.

- لازم تتكلمي معاه كتير و توصفي كل الاحداث خلال اليوم. " كوني له مدحت شلبي يكون لكي ابو تريكه و يبدع فالكلام "

- و انتي في المطبخ توصفي كل حاجه بتعمليها اغسل طماطم اقطع طماطم طماطم شكلها مدور شكلها دايره اكل طماطم و هكذا في الخضروات و الفواكه و الطعام و المشروبات)

-اخري استجابتك له لما يطلب بالاشاره و حفزيه للكلام ديما يعني هتعملي انك مش فاهمه هيشاور على مايه قولي عايز ايه ؟ هيشاور على مايه قولي عايز ايه تاني مش فاهمه ؟ هياخدك من ايدك لحد المايه قوليله اااه مايه عايز مايه او اشرب و بعدين يشرب شويه و نرجع نسأل دي ايه ؟ و نرد مايه حتي لو مكنش فيه استجابه منه عادي مع التكرار و التدريب المستمر هتلاقي نتيجه

- لازم يبقى فيه اوامر كتير و ينفذها و تحفيزه على الكلام. "مهم انك تكوني واثقه انه فاهم الطلب و الأمر عشان يقدر ينفذه"

- الاوامر البسيطه زي (هات - خد - افك - اركب - تعالى - روح - اقف - اقعد - اطلع - انزل - افتح - اقفل )

- نشتغل على مهارات ما قبل اللغه زي ( اصقف - ارفع ايد فوق - انزل ايد تحت - اخبط على ترابيزه )

- يفضل انه يندمج مع البيئه المحيطه حواليه و لما ينزل الشارع مع ماما او بابا طول ما احنا ماشين نسمي الاشياء حوالين الطفل زي (دي عربيه - دي قطه - ده كلب - ده حصان - دي طماطم - ده موز - ده لون احمر اصفر ازرق و هكذا)

- لازم انشطه كتير زي بازل - صلصال - مكعبات - خرز و خيط - لوحة الدبابيس

**مجموعه من الفتاوي اللي ملهاش اساس من الصحه..

-خلي الواد يقعد قصاد التلفزيون و هو هيلقط و يتكلم منه

-إدي (اعطي) الواد دوا سبيك سموث و هو هيبقى زي الفل

-الاوميجا 3 هيخلي الواد يتكلم بسرعه "بعض انواع الاميجا بتخلي الطفل عنده هايبره"

-التطعيمات بتخلي الواد يتأخر في الكلام

-جلسات الاكسجين المضغوط في بعض الحالات غير مجديه

**اللغه بتنقسم الى قسمين :

اللغه الاستقباليه : هي المحصول اللغوي او الاشياء اللي يقدر يتعرف و يشاور عليها الطفل (التعرف)

اللغه التعبيريه : هي المحصول اللغوي او الاشياء اللي يقدر يسميها باسمائها (التسميه)

**تطور لغة الطفل الطبيعي حسب عمره :

في السنه الاولى من عمر الطفل :هي فترة مناغاه و تكوين مقاطع صوتيه

من عمر سنه الى سنتين : يبدأ يقول كلمات مفرده و جمل بسيطه من كلمتين

من عمر سنتين الى الثلاث سنوات : بيكون جمل من كلمتين الى ثلاث كلمات زي " عايز اشرب مايه "

من عمر ثلاث الى اربع سنوات : بيكون جمل من ثلاث كلمات و جمل حواريه

من عمر اربع الى خمس سنوات: بيكون جمل حواريه و ضمائر و صفات و يحكي قصه

من عمر خمس الى ست سنوات : فهم الجمل البلاغيه و اكتمال اللغه..

التعليقات (0)
الرجاء تسجيل الدخول لتتمكن من التعليق
مقالات مشابة
...إخلاء مسئولية: جميع المقالات والأخبار المنشورة في الموقع مسئول عنها محرريها فقط، وإدارة الموقع رغم سعيها للتأكد من دقة كل المعلومات المنشورة، فهي لا تتحمل أي مسئولية أدبية أو قانونية عما يتم نشره.