الهيلثي ، الصحة والحياة الصحية السليمة والتغذية السليمة
الأكل الصحي هو الأكل العادي اللي بناكله كل يوم ، ولكن متقدم بشكل متوازن ، وزي ما في توازن في البيئة ، في كمان توازن في جسمنا ، كل حاجة بتدخل جسمنا بتأثر عليه ، الطبيعي ان الاكل مهمته يساعدنا نستمر ، يساعدنا علي الحياه ، يمدنا بالطاقة اللازمة عشان نقدر نقوم بواجبتنا الأساسية ، لكن مش هنقدر ننكر ان الأكل فيه شهوة ولذة كبيرة جدا ، الأكل شئ ضرورى ممكن تاكل اي حاجة ، لكن رغبتك في الأكل ممكن تخليك تاكل حاجة مش متوازنة او مش صحية .
احنا بناكل ايه ؟
بيدخل جسمنا 3 انواع : بروتين و كربوهيدرات و دهون
وكل حاجة منهم ضرورية ومهمة لحاجات معينة .
البروتينات :
بدون الدخول في تعريف علمي ، خلينا نقول ان البروتينات هي اهم مكون خاص بتكوين وتغذية العضلات والخلايا ، وتفعيل عملية التمثيل الغذائي في الجسم ، وبالتالي مفيش حد يقدر يعيش من غير بروتين ، كل كيلو جرام من وزن جسمنا بيحتاج جرام بروتين في اليوم علي الأقل ، وكل ما تقل نسبة البروتين الأساسية هنبدأ نحس بضعف وقلق وهتقل مقاومة جسمنا للأمراض ، والبروتين موجود بشكل اساسي في اللحوم والدواجن والأسماك ، وبشكل بسيط في بعض الحبوب والبقوليات والمزروعات .
الكربوهيدرات :
هي المواد النشوية الموجودة في الحبوب والبقول والفواكه والألبان ، عادة الكربوهيدرات بتدخل الجسم وتتحول لسكر جلوكوز في الدم ، ودا اللي بيمد جسمك بكل مصادر الطاقة وتحديدا المخ ، وكل ماتزيد نسبة الكربوهيدرات عن اللي الجسم محتاجه ، بتتخزن في الكبد او في الجسم دهون عشان الجسم يحرقها وقت مايحتاج طاقة اكبر . لكن ضرورى نعرف بشكل مبدئى ان في كربوهيدرات معقدة وكربوهيدرات بسيطة .
الدهون :
وهي المواد الدهنية المتوفرة في الزيوت ، وفي الفواكه والخضراوات ، والألبان واللحوم . الدهون علي عكس الفكرة السلبية عنها بتكون مفيدة جدا للجسم ، طول ما هي في النسبة المنطقية اللازمة ، لأنها بتساعد الجسم انه يحتفظ بدرجة حرارته . وبتساعد علي امتصاص الفيتامينات ، وبتمد الجسم بالطاقة ، وبتساعد في بناء الخلايا . لكن زيادة الدهون عن وضعها الطبيعي ممكن تسبب ازمات قلبية ، وتأذي الجسم بشكل كبير ، وطبعا غير أنها بتخلي شكل جسمنا غير محبب . الدهون في منها البسيط الطبيعي اللي موجود في المكسرات وبعض الفواكه ، وفي منها المركب ، واخطر انواع الدهون هي الدهون المهدرجة المصنعه واللي بتأثر سلبا علي الجسم بشكل كبير .
ازاى ناكل اكل متوازن ؟
بعد ما عرفنا ايه بيدخل جسمنا ، اكيد بدأنا بشكل بسيط نفهم احنا محتاجين ناكل ايه وازاي ، محتاجين ناكل أكل متوازن ، البروتينات تكون الجزء المهم فيه ، والكربوهيدرات تكون موجودة بنسبة بسيطة بحيث تساعد الجسم علي اكتساب الطاقة من غير ماتزيد عن حاجة الجسم وتتخزن كسكر زيادة في الكبد والجسم ، وندخل لجسمنا نسبة دهون طبيعية غير مصنعة بشكل بسيط ومنطقي . ولو خلينا القاعدة دى قدامنا هنقدر ناكل كل حاجة من غير ما نعقد نفسنا .
بروتين اكتر + دهون صحية اقل + نسبة صغيرة جدا من الكربوهيدرات = اكل متوازن
يا بخت من وزن أكله وموزنش نفسه
بتقف كل شوية علي الميزان وتسأل نفسك انا ازاي بعد اسبوع دايت نزلت 100 جرام بس ؟ بتوزن نفسك كل يوم الصبح وبالليل وعاوز تحس بالفرق بسرعة جدا ؟ بيجيلك احباط لما تحس ان وزنك مقلش ، وبتبدأ تكسل ومتحافظش علي أكلك وشكلك وجسمك عشان بقيت مقتنع انها مش فارقة ؟
تعالوا نفكر سوا في الموضوع دا ، انت مهتم بوزنك فقط ، ولا بشكل جسمك فقط ، ولا بوزنك وشكل جسمك ؟
جسمنا بيتكون من هيكل عظمي وكتلة عضلية ودهون . الهيكل العظمي ملناش دخل في شكله او تكوينه او طبيعته ، لكن الكتلة العضلية والدهون بيحددوا تقريبا شكل جسمنا الخارجي ، ودول حاجتين لنا تدخل فيهم .
الدهون شيئ مهم في الجسم لحفظ حرارة الجسم ، ومد الجسم بالطافة ، وبتساعد في شطل كبير في امتصاص الهرمونات في الجسم ، وبالتالي لازم جسمنا يحتوي علي نسبة من الدهون ، لكن النسبة لو زادت بيحصل انه يتم تخزين الدهون الزائدة في الجسم باشكال مختلفة ، ومن اكتر الأشكال المخزن فيها الدهون بتكون منطقة البطن والأجناب والأرداف والرجل . وتتحول الدهون الزائدة ومع تراكمها لترهلات شكلها مش محبب ، وعادة زيادة وزن الجسم في صورة الدهون الزائدة بيضغط علي العضلات والمفاصل والأعصاب وبيسيب مشاكل في ارتفاع نسبة الكوليسترول في الدم واحتمالية الاصابة بانسداد او تصلب الشرايين لا قدر الله , طيب ايه اللي مفروض نفكر فيه ؟
المفروض نفكر في ان شكل جسمنا يكون سليم ، لأن عادة لو شكل جسمنا سليم والكتلة العضلية مظبوطة فدا معناه ان الدهون في نسبتها الطبيعية او علي الأقل في نسبة غير ضارة .
وعشان تكون الكتلة العضلية قوية وواضحة ومظبوطة لدرجة ان شكل جسمنا يكون كويس وجميل ، دا معناه اننا بنمارس رياضة وتمارين بشكل يدعم كتلتنا العضلية .
ازاي نعمل صيام متقطع ؟
ممكن تبدأ يومك بقهوة لو حابب ، وبعد فترة اول ماتحس بالجوع تاكل وتحسب من بعدها 8 ساعات مسموحلك تاكل فيهم ، يعني اجمالي فترة الـ 16 ساعة يقظة بناكل خلال 8 ساعات فقط فيهم .
استخدام الصيام المتقطع
عرفنا ازاي نعمل صيام متقطع ، طيب ممكن نعرف استخدامه والأكلات المتاحة فيه ؟
الصيام المتقطع فيه ميزة عظيمة جدا ، انه مسموح فيه بكل شئ ، لكن طبيعة الأكل نفسه بتحدد الصيام هيأثر علينا ازاي ، يعني مسموح ناكل حلويات ومخبوزات ، واكل محمر ومكرونة ورز ولحوم ، وعصائر وخضراوات وكل شئ في فترة الاكل .
لكن لو كلنا نشويات كتير وسكريات كتير جسمنا هيزيد ، صحيح هيزيد بكمية أقل من المعتاد كتير لكن هيزيد نسبيا ، ولو قللنا المحمر والنشويات والسكريات جسمنا هيخس ، ولو اعتدلنا جسمنا هيثبت .
في نقاط سريعة عاوزين نفكركم بيها :
- قرر انك تكون هيلثي وتعيش بسعادة وصحة من اهم قرارات حياتك .
- الصحة السليمة بتأثر في صاحبها وبتخليه انسان مختلف علي كل المستويات .
- الأكل ممكن يبقي أداة للمتعة وللصحة لو اتعلمنا ازاي نتعامل معاه بشكل سليم .
- هدف الدايت مش المنع ، هدف الدايت التنظيم .
- الدايت مش تجويع ، ولكن ظبط كمية ونوعية ومواعيد عشان جسمك يسترد حيويته وقدرته علي الحرق ، ويقدر بعد كده يساعدك تعيش بشكل أصح .
- معادلة الكربوهيدرات والدهون والبروتين .
- افتكر ان الدهون الطبيعية مفيدة بكميات قليلة وان الدهون المصنعة خطر .
- اتمشي مع صحابك وحبايبك .
- الرياضة مش شرط تكون جيم وتدريبات صعبة والتزام ، اشفط بطنك واتنفس كويس واتمشي حتي لو في المول .
- انت ممكن تكتسب عادات جديدة لو عندك الارادة والحافز .
حافظ علي صحتك
