الرياضه وصحتك النفسية
"طبعًا، كلنا عارفين فوائد الرياضة على صحة الجسم، سواءً إنها بتقوي العضلات والعظام وكمان بتزيد مناعة الجسم. بس النهارده حابب أكلمك عن الرياضة وتأثيرها على صحتك النفسية وإزاي تقدر بالرياضة تحسّن مزاجك وتنجز في شغلك ودراستك أو حياتك بشكل عام، العملي والاجتماعي.
أنت تعرف يا صديقي إن الرياضة تفرز بعض الهرمونات في الجسم زي الإندورفين والسيروتونين اللي هي مسؤولة عن السعادة وتقليل الضغط النفسي بشكل عام.
وعايز أقولك كمان إن الرياضة بتعمل على تدفق الدم والأوكسيجين للدماغ، وده طبعًا بيقلل جدًا التوتر والقلق اللي أحنا دايمًا بنواجهه في حياتنا الاجتماعية والعملية، وبنحتاج في مواقف كتير نكون أعصابنا هادئة عشان نعرف نواجه كل ده.
طبعًا، قلة النوم من أكثر الأشياء اللي فعلًا بتأثر على حالتنا المزاجية، يعني إنت لو نمت فترة كويسة متواصلة هتصحى من نومك قادر نفسيًا وجسديًا تواجه أي توتر أو قلق أو ضغط نفسي، وأكيد كلنا بنواجه في بعض الأحيان قلق وصعوبة في النوم، صدقني يا صديقي وعن تجربة شخصية، الرياضة كانت الحل الجذري بالنسبة لي في صعوبة النوم.
غير بقي إنها ليها قده لخروجك من روتين الحياة اللي أحيانا بيبقى ممل ومليء بالأفكار والتحديات.
طيب السؤال هنا: هل في رياضة معينة هتساعدني على تحسين صحتي النفسية؟ أحب أقولك طبعًا أي رياضة هتساعدك جدًا على تحسين صحتك النفسية والجسدية وهتحسنلك مزاجك جدًا كمان، بس خليني أقولك على كام نصيحة كده هتفرق معاك.
أولا: التنفس، لازم تتنفس كويس شهيق وزفير أثناء ممارستك للرياضة، إذا كنت في الجيم بترفع أثقال، بتجري، بتمشي، بتلعب أي لعبة إذا كانت قتالية أو غيرها، التنفس شئ أكيد مهم وهيفرق معاك جدًا.
ثانيا: حابب أقولك مش لازم تلعب رياضة معينة لأنها هي الأفضل أو لأنها هي الأكثر فاعلية في حرق الدهون، إنت لازم تلعب الرياضة اللي بتحس فيها بمتعة والمتعة دي اللي هتخليك تستمر واللي هتخليك حابب تتمرن أكتر ومستواك يتقدم أكتر.
وبمناسبة الصحة النفسية حابب أحكيلك قصة لاعبنا المصري إبراهيم الحسيني حمدتو، المعروف أيضًا باسم "إيمبو"، هو لاعب تنس الطاولة البارع من مصر اللي تعرض لحادث افقده ذراعيه الاثنين! شئ صعب جدا بيتهيألي الحادث ده قادر يحطم أقوي شخص نفسيا.
بس فاكر إني قولتلك إيه في أول القصة لاعبنا المصري! أه لاعبنا المصري الجبار اللي خسر ذراعيه ولكن لم يخسر حياته ولم يخسر شغفه وحبه باللعبة اللي طول عمره بيحبها.
هو مش مجرد إنه حاول يعمل شئ شبه مستحيل ويلعب تنس طاولة بفمه!! لا ويبقى متمكن ومحترف جدا، ده قدر يخلق لنفسه عالم وتحدي ومتعة وبطولات من هذه اللعبة، انت متخيل حبه للرياضة حول حياة البطل إيمبو من أيه لأيه، انت متخيل يا صديقي انه بقى شخص مشهور حاصل علي بطولات! وده أكيد أثر تأثير إيجابي لدرجة كبيرة جدا علي حياته.
وطبعا قصة البطل الكبير عادل مصدق الحوت اللي تعرض لحادث ايضا وفقد قدميه الاثنين، شئ أكيد أنه اتعرض لصدمة نفسية كبيرة جدا، الا انه اتجه للرياضة هي الرياضة يا صديقي وابتدى يتمرن في الصلات الرياضية لرفع الاثقال، بس كده؟! لا ده حصل علي ميداليات ذهبية وبطولات في لعبة رفع الاثقال، عادل الحوت بيقول انا لما تعرضت للحادث الحياة توقفت بس قررت مكملش في احساسي ده قررت ان حياتي ماتتوقفش مش بس كده انا قررت ان حياتي تبقي مش عادية ومميزة اكتر ما كنت سليم.
دي بعض القصص اللي حاولت أوصلك بيها ازاي اشخاص تعرضوا لحوادث صعبة جدا وهما اللي اخذوا حياتهم من طريق لطريق ودائما هتلاقي ده حصل عن طريق الرياضة والشغف بها.
