القاتل اللذيذ.. ليه الوجبات السريعة بتدمر جسمك وأنت بتضحك؟
القاتل اللذيذ.. ليه الوجبات السريعة بتدمر جسمك وأنت بتضحك؟
كلنا بنضعف قدام ريحة البرجر المشوي أو شكل علبة البطاطس المقلية وهي طالعة سخنة ومقرمشة وطبعاً "الدليفري" هو الحل السحري لما بنكون كسلانين نطبخ أو راجعين من الشغل مقتولين تعب بس الحقيقة اللي بنحاول نتجاهلها وأنا بنقطم أول قطمة إن الوجبات السريعة أو "الفاست فود" عبارة عن قنبلة موقوتة بنرميها جوه جسمنا والنتائج بتبان على المدى البعيد في شكل أمراض وتعب ملوش آخر.
قنبلة سعرات.. ومفيش فايدة!
أكبر مشكلة في الوجبات السريعة إنها بتديك "سعرات حرارية" بالهبل بس "قيمة غذائية" صفر إنت بتاكل كمية دهون مشبعة ونشويات متصنعة وسكريات تخليك تحس بالشبع وقتي بس جسمك من جوه بيفضل جعان للعناصر المهمة زي الفيتامينات والمعادن والألياف النتيجة؟ وزنك بيزيد بسرعة الصاروخ وبتبدأ تظهر "الكرش" والجناب وفي نفس الوقت بتحس إنك همدان وما عندكش طاقة لأنك حشيت معدتك "قش" مش تغذيه بجد
شرايينك بتستغيث: الدهون والملح
لو سألت قلبك عن رأيه في الوجبة السريعة هيقولك "ارحمني" الوجبات دي مليانة "صوديوم" (ملح) بنسب تخض وده بيخلي الجسم يخزن مية ويرفع ضغط الدم بشكل مفاجئ. غير كده الدهون المتحولة اللي بتستخدم في القلي بتترسب في الشرايين زي الصدأ في المواسير ومع الوقت بتسد الطريق قدام الدم وده اللي بيفتح الباب لأمراض القلب والجلطات - لا قدر الله - حتى عند الشباب الصغير
فخ السكر ومرض السكر
مش بس الدهون هي اللي بتخوف الصوصات اللي بتتحط (كاتشب، مايونيز، صوص الشيدر) والعيش الأبيض نفسه بيتحولوا لسكر في دمك في ثواني ده بيخلي "البنكرياس" يشتغل بأقصى طاقته عشان يفرز إنسولين ويلاحق على كمية السكر دي لما تكرر الموضوع ده كتير البنكرياس بيتعب والجسم بيبدأ يرفض الإنسولين وده الطريق السريع للإصابة بمرض السكر من النوع التاني
تأثير "الفاست فود" على المود والدماغ
تصدق إن اللي بتاكله بيأثر على "مزاجك"؟ الأبحاث أثبتت إن كتر أكل الوجبات السريعة بيزود احتمالية الإحساس بالاكتئاب والتوتر الأكل ده بيعمل حالة من "الإدمان" في الدماغ؛ تحس إنك عايز تاكل منه تاني وتالت عشان تحس بالسعادة اللحظية وبعدها بشوية تقع في "خمول" وتعب ذهني ده غير إن السكر والدهون الكتير بيأثروا على التركيز والذاكرة ويخليك دايماً حاسس بـ "ضباب" في دماغك ومش عارف تنجز شغلك.
المعدة بيت الداء: القولون والانتفاخ
طبعاً مفيش وجبة سريعة بتعدي من غير ما تسيب أثرها على الجهاز الهضمي الزيوت المهدرجة والمواد الحافظة بتعمل تهيج في جدار المعدة والقولون غالباً بعد الأكلة دي بتحس بحموضة . انتفاخ . وعسر هضم يخليك مش قادر تتنفس. ومع الوقت الأكل ده بيبوظ "البكتيريا النافعة" اللي في أمعائك وهي دي المسؤولة عن مناعتك وصحتك العامة
نصيحة لوجه الله.. الاعتدال هو الحل
إحنا مش بنقول احرم نفسك للأبد بس بلاش تخلي "الدليفري" هو أسلوب حياتك لو نفسك راحت لوجبة خليها مرة كل فين وفين وحاول تعوضها بشرب مية كتير وخضروات جسمك هو المكان الوحيد اللي هتعيش فيه طول عمرك فبلاش تهد جدرانه بوجبة "تيك أواي" طعمها حلو لمدة 10 دقائق ووجعها بيفضل سنين استبدل الفاست فود بأكل البيت وهتحس بالفرق في صحتك وجيبك وكمان مودك
