قصة ولادة (١) الجزء الأول

قصة ولادة (١) … الجزء الأول 

 

مرحبا صبايا ربنا يقومكن بالسلامة يا رب ❤️ حابة اشاركن تجربة ولادتي ..

البداية رح تكون من غرفة الطوارئ لما وصلتها يوم الاحد 25/9 لفحص طبيعي عشان وصلت اسبوع 40، وانا هناك عملولي مونيتور وحكولي عندك طلق وانا مش حاسة باشي وحكولي بدنا نفحص التفتح وبالفعل فحصوا ولاقوا عندي تفتح 1.5 وقرروا يروحوني وارجع بعد 3 ايام اذا ما صار عندي بوادر ثانية زي طلق او نزول مي، ثاني يوم، يوم الاثنين الساعة 8 بالليل بديت احس زي بطني بشد وبرخي كل 5 دقايق بس بدون وجع فعرفت انه هذا طلق منتظم،قررنا نرجع على الطوارئ وحكولنا انه اه في طلق وفي تفتح 3 لازم تدخلي على غرفة الولادة، ستنينا وانا بلشت امشي بالطوارئ لحد ما يوصل دورنا نفوت على غرفة الولادة واجوائي طول الوقت ايجابية ضحك ومشي، ثارت الساعة 12 بالليل فتنا على غرفة الولادة اخذت الحقنة واخذت دش ساخن وبلش التفتح يزيد من 3 الى 3.5 وبعدها ل 5 وانا الحمد لله مش حاسة بوجع قوي ونزلولي مية الراس، فسألوني بدك ابرة؟؟

حكيتلهم مش هسا بدي استنا لاني شفت جسمي متقبل الطلق بدون اوجاع، من تفتح 5 وصلت بالتدرج لتفتح 8 و 9 بدون زيروز، هون بديت اشعر بالطلق بشكل رهيب بس قدرت اتحمله وشغلت قرآن وصرت اقرأ معه بصوت عالي (اشي كثير كثير ساعدني امرق الوجع والوقت) وحكولي صعب هسا توخذي اي اشي بسكن الوجع لانه التفتح قريب لل 10 

 في هذه اللحظات قرروا يعطوني زيروز في الوريد ووصلت تفتح 10 بسرعة وانا بدون إبرة واجا وقت الشد، هون بعد 7 ساعات بطل فيا حيل وطاقة اشد يحكولي شدي شدة طويلة اشد قصيرة وما بتكفي ليطلع الولد.

بهاي الأثناء حكتلي المولدة مدي ايدك حسي راسه وشعراته وراح تشوفي انه ظايل شوي شدة بسيطة طويلة وبطلع وبالفعل حسيت شعراته 🥺، بس انا فش فيا طاقة جسمي بطل يتجاوب معي زي ما لازم، وعشان انا بدون ابيدورال معي بس ساعتين متن ما وصلت تفتح 10 اشد عشان اخلف بعدها بصير خطر كبير كثير على الطفل، وانا احاول واحاول واحكي للمولدة والله اني بشد وبحاول 😭😭 وقتها المولدة فاجئتني وحكتلي …  يتبع

لقراءة الجزء الثاني اضغط هُنا

لمعرفة كيف تعتنين بشعرك اضغطي هُنا